Aleeqap atornerluinera
Inuusuttut Ataqatigiit: Qinersineq pisariaqarpoq
Inuusuttut Ataqatigiit politikkikkut pissutsit akuersaarsinnaajunnaarpaat. Unioqqutitsinerit utoqqatsissutissaqanngillat, IA-p inuusuttaani siulittaasoq oqarpoq
– Nunatta aningaasaataanik atornerluineq qaqugumulluunniit akuersaarneqarsinnaanngilaq atornerluisimagaanilu akisussaaffik tiguneqartariaqarpoq, periarfissarlu ataasiinnaavoq tassalu tunuarnermik nalunaaruteqarneq! Uanilu apeqqutaanngilaq Aleqamik, Kuupimmik allamilluunniit ateqarneq, Aleqa Hammondip landskarsip aningaasaataanik unioqqutitsilluni atuisimaneranut oqaaseqaatitut Inuusuttut Ataqatigiit siulittaasuat Múte Bourup Egede oqarpoq.
Inuusuttut Ataqatigiit tusagassiorfinnut nalunaarutikkut nangipput:
"Inuusuttut Ataqatigiinni isumaqarpugut politikkikkut suliaqartut akornanni pissaanermik atornerluisarneq unittariaqalersoq! Piffissanngorpoq ingerlariaqqilluni alloriaqqinnissaq. Innuttaasutut periarfissinneqartariaqarpugut qinersinikkut. Pissusitoqqat nunatta aningaasaataanik piumasarsornermik akuersaarnertallit ingerlatiinnarusuppagut? Imaluunniit ingerlariaqqikkusuppugut, eqqullugulu aqutseriuseq akisussaaffimmik ataqqinnilluni, unneqarilluni patajaatsumillu ingerlatsilluni aqutseriuseqarnermik ingerlatsineq? Maanna nunatsinni ukiorpassuanngortuni aqutseriuseq piumasarsorsinnaanermik periarfissiisoq inuiaqatigiinnut pitsaanngilluinnarpoq nunarsuarmilu isigineqarnitsinnut innarliilluinnarluni.
Nunatta karsia namminerlu aningaasaqarneq avissaaqatitassaapput – Minibar-imit imikkat nunatta akilagassarinngilai.
Inuusuttut Ataqatigiit isumaqarput akuersaaginnarneqarsinnaanngitsoq nunatta karsia minibar-iniit atuinermut akiliisittassallugu. Akuersaarneqarsinnaanngilartaaq atorfilittat suliakkertassallugit immineq ilaquttat angalanissaata aaqqissornissaanut. Akuersaarneqarsinnaanngilluinnarportaaq nunatta aningaasaatai immineq ilaquttat angalanissaanut akiliigallartittassallugu. Taamaaliortoqarniarpammi nammineq akiliigallartoqartariaavoq nunatta aningaasaataasa atornerlunneqannginnissaat anguniarlugu. Nunattami karsia qaqugumulluunniit atornerlunneqartussaanngilaq imminut iluaqutississornissaq anguniarlugu.
Atornerluineq illersorneqarsinnaanngilaq
Inuusuttut Ataqatigiinni akuersaanngilluinnarparput Naalakkersuisut siulittaasuata akiitsuerutereerami ingerlariaqqittoqariaannanngorneranik oqariartuuteqarnera. Aningaasaatitsinnimmi atornerluisimaneq torersumik naalakkersuinermik pissusiusussat tunulliullugit ingerlatsinermik aallaavilik illersorneqarsinnaanngilluinnarpoq. Pigisatsinnik atornerluisimagaanni inatsisillu unioqqutillugit taava tunuarnissaq avaqqunneqarsinnaanngilaq utoqqatsissutissanilluunniimmi saqqummiusisoqartariaananiluunniit. Maanna Naalakkersuisut siulittaasuata iliuusaa allamik nalilerneqarsinnaanngilaq, tassalu inuiaat isumaat tusaanagu immineq pissaanermik tigumminniinnarumalluni atanersuunnarneq, Inuusuttut Ataqatigiit siulittaasuat Múte Bourup Egede allappoq.