Inuusuttut angerlarsimaffiup avataanut inissinneqarsimasut 18-inik ukioqaleraangamik imminiiginnarneqartartut IA-p aarleqqutigaa
Inuusuttut angalersimasimaffiup avataanut inissinneqarsimasut nammineertussanngoraangamik angerlarsimaffeerutinnginnissaat nunanulluunniit allanut aallaannarnissaat pinngitsoortinniarlugu periusissiortoqartariaqartoq, Mikivsuk Thomassen isumaqarpoq.
Inuusuttut angerlarsimaffiup avataanut inissinneqarsimasut inuusuttunit allanit ilungersuuteqarnerupput. Misissuinerit arlallit tamanna takutippaat. Ilinnialernissamut, suliffeqalernissamut aammalu namminerisaminnik angerlarsimaffeqalernissamut nukissaqannginnerusarput.
Tamanna aamma isumaqarpoq inuusuttut taakku imigassanik aalakoornartortalinnik ikiaroornartumillu atornerluisunngornissaminnut kiisalu angerlarsimaffeerunnissaat aarlerinaateqarnerusartoq. Taamaammat periusissiortoqartariaqarpoq, Mikivsuk Thomassen (IA) naqissusiivoq.
- Ajornartorsiutit angerlarsimaffeerunnermik, nunanut allanut nuunnermik aammalu ajornartorsiutinik taaneqartunik allanik nassataqartartut pinngitsoorniarlugit periussisiortoqartariaqarpoq. Periusissiakkut inuiaqatigiit qanoq iliorlutik inuusuttunik taakkuninnga inissinneqarnerisa kingorna pitsaanerusumik tapersersuisinnaanersut taamaalillutillu namminneq inuuneqalernissaannut inersimasutullu inuunerup atugarititaanik nammassinnaanngornissaannut tapersersuisinnaanersut tikkuarneqassaaq, Inatsisartuni ullumi oqaluuserisassamut siunnersuummini Mikivsuk Thomassen tunngavilersuilluni allappoq.
Tapersersuineq malitseqartitsinerlu naammattumik atorneqanngitsut
Københavnimi Kalaallit Illuutaata nalunaarusiaata takutippaa, inuusuttut Københavnimut nuuttartut ukiuni marlunni kingullerni amerliartuinnartut, taakkulu nuunnerminni toqqaannartumik angerlarsimaffeeruttartut aanngajaarniutinillu annertungaatsiartumik atornerluisunngortarlutik. Misissuinerup takutippaa inuusuttut taakku affaat angajoqqaaminniinnatik perortartut. Ilinniakkamik unitsitsinerit najugassaarunnerillu Kalaallit Nunaanniit nuunnermik peqqutigineqakkajupput.
- Meeqqat inuusuttuaqqallu 18-inik ukioqalerneranni kommunini aalajangiisoqarpat tapersersuineq malitseqartitsinerlu pisariaqassasut taava Meeqqanut tapersiisarneq pillugu Inatsisartut inatsisaanni nr. 20, 26. juni 2017-imeersumi kapitel 11-imi iliuuseqarnissamut periarfissaqartoq ilisimalluarparput. Periarfissap taassuma naammattumik atorneqartannginnera pasitsaassimalerparput. Taamaammat attuumassuteqartut inatsisip siunertaanik naammassinnissagutta qanoq iliornissatsinnik siunnersuuteqartussat misilittagaannik tunngaveqarluni periusissiortoqarnissaa piumasaraarput, Mikivsuk Thomassen (IA) allappoq.
Naalakkersuisut tapersiipput
Peqqissutsimut isumaginninnermullu Naalakkersuisoq, Martha Abelsen (S) siunnersuummut tapersersuilluni akissuteqaammini allappoq.
- Naalakkersuisut Mikivsuk Thomassenitut, meeqqat tapersersorneqarnissaanut inatsit naapertorlugu, malitseqartitsisarneq pillugu malittarisassanik kommunit malinninnersut soqutigisaqarput. Tamanna qulakkeerniarlugu, kommunit susassaqarfimmi maleruagassanik periusissanillu malitassaminnik peqarnissaat pingaaruteqarpoq. Taamaammat Naalakkersuisut inuusuttunut malitseqartitsisarnernut arlaatigut pilersaarusiortoqarnissaa pillugu aalajangiiffigisassatut siunnersuummut isumaqataapput, inuusuttummi 18-iliiffimminni meeqqat tapersersorneqarnissaannut inatsit malillugu ikiorserneqartarmata, Martha Abelsen (S) akissuteqaammini allappoq.