Inuusuttut aalisarsinnaalerput

Aalisartunut nutaanut inuusuttut aalisalernissaq ajornakusoorsimavoq, pissutigalugu akuersissummik pisinnaasimannginnamik. Tamanna pissutigalugu inuusuttut arlallit angummik akuersissutaat atorlugu aalisartariaqartarsimapput.
Assersuutigalugu Ole Gaba Davidsen, Uummannarmiu. Taanna Tamanut Avannaani-mut nr. 10-mut maajip 7-anni saqqummersumut oqaluttuarpoq ukiuni marlunni akuersissummik qinnuteqartarsimalluni akineqarnerli ajorluni. Angummi Samuel Davidsenip akuersissutaa atorlugu aalisartarsimavoq. Marluullutik immikkut aalisarusukkaluarput.
Tamanna Naalakkersuisut maanna allanngortinnialerpaat. Taamaattumik akuersissutinik pisassanillu tunniussisarneq oqilisaaffigaat.
Ataasinngornermi juulip 7-anni aalisarnermut akuersissutit pisassiisarnerlu pillugit nalunaarut nutaaq Naalakkersuisut akuersissutigaat. Nalunaarut allanngortinneqartoq atuutilissaaq marlunngornermi juulip 15-ianni 2014.
Tamanna pissutigalugu maanna inuusuttut, aalisarnermik ilinniarfimmi ilinniagaqarsimasut, imaluunniit aalisarnermik naammattumik piginnaasaqalersimasut immikkut akuersissummik tunineqarsinnaalerput.
Nalunaarummi allanngortinneqarsimasumi iliuutsit nutaat arfineq-marluupput, aalisarnermullu akuersissutit pisassiisarnerillu pillugit allannguutit aajuku:
* Inuusuttunut aalisartunut Imarsiornermut Ilinniarfimmi aalisarnermik ilinniarsimasunut imaluunniit Aalisarnermik Piniarnermillu Ilinniarfimmi ilinniarsimasunut immikkut ittumik akuersissuteqartoqarsinnaavoq. Akuersissummik tunineqarnissamut piumasaqaataavoq pineqartup inuussutissarsiummik umiatsiaqarnissaa aamma aalisarnermi atortoqarnissaa.
• Kiisalu inuusuttunut alliartornerminni nalinginnaasumik aalisarsimasut naammattunik piginnaasaqalersimasunut immikkut ittumik akuersissuteqartoqarsinnaalissalluni. Akuersissummik tunineqarnissamut piumasaqaataavoq pineqartup inuussutissarsiummik umiatsiaqarnissaa aamma aalisarnermi atortoqarnissaa.
• Sinerissamut qanittumi qaleralinniummi inuttaasut ukiuunerani qaammatini aalajangersimasuni immikkut ittumik akuersissummik tunineqarsinnaapput. Tassani piumasaqaataavoq pineqartup uppernarsarsinnaassagaa sivikinnerpaamik ukiumi ataatsimi ataavartumik inuttatut sulisimanini, kiisalu pineqartup inuussutissarsiummik umiatsiaqarnini aalisarnissamullu atortoqarnini.
• Piffissamut killilikkamut akuersissutit ukiunut marlunnut atuuttussanngortinneqarneri.
• Sinerissamut qanittumi umiatsiaararsorluni aalisakkanik sunilluunniit aalisarnissamut akuersissutit nalinginnaasut atuuttussanngortinneqarneri. Akuersissulli nalinginnaasoq taanna Qeqertarsuup Tunuani, Upernavimmi Uummannamilu aqutsiveqarfinni qaleralinniarnissamut atuutsinneqanngilaq. Aqutsiveqarfinni taakkunani qaleralinniarnissamut akuersissutit suli immikkut ittumik tunniunneqartassapput.
• Umiatsiaaqqanik saarullinniarnermi tunisinikkut killilersuisoqartinnagu tamanut immikkut akuersisoqarsinnaanissaanut periarfissiisoqassaaq. Taamaalilluni kikkunnut tamanut saarullinniarlunilu tunisisinnaanissamullu periarfissiisoqassaaq.
• Pisassiissutinik pigisaqarluni sinerissamut qanittumi qaleralinniarnissamut akuersissuteqartarnermi pisassiissutinik ukiumiit ukiumut nuussisinnaaneq atuutsinneqalissaaq.