Tasiilaq
Inuusuttut 20-it ilinniartuunissamut periarfissinneqarput
Immikkut aningaasaliissuteqartoqarneratigut inuusuttut Tasiilamiittut ilinniartitaanermut ataannaarnissaat qulakkeerneqarpoq
Ilinniartut pikkorivissunik taagorneqartut Tasiilasmi Piareersarfimmiittut ilinniartitaanermi ingerlariaqqinissamut periarfissaq pigiinnartussanngorpaat. Tamanna pivoq inuussutissarsiornermut, aatsitassanut sulisoqarnermullu pisortaqarfiup immikkut aningaasaliissuteqarneratigut.
Atuaqatigiit taakku pikkorivissunik taagorneqarput meeqqat atuarfianni fagimi ataasiinnarmi karakterit pitsanngortissinnaagunikkit ilinniartunngornissamut periarfissaqalissagamik.
Misilittakkat pitsaasut
Ilinniartut tamarmik suliffeqarfinnut attaveqassapput, ilinniartitaanissamik pilersaarusiorfigineqarnikkut suliffeqarfiup iluani ilinniarfigerusutartik aallutariniassammassuk. Ilinniarnerminik karakteriminnik qaffassaanissamik pisariaqartitsigaangamik Piareersarfimmut takkullutik qaffassaajartortassapput.
Kommuneqarfik Sermersuumi isumaginnermut, suliffeqarnermut inuussutissarsiornermullu ataatsimiititaq maanna Tasiilami angalavoq inuusuttullu periarfisseqqinneqarnerannik ilisimatinneqarluni.
- Taamasiornikkut inuusuttut ilinniartitaanermi uniinnartussaagaluit ingerlaannarnissaat angussavarput, isumaginnermut, suliffeqarnermut inuussutissarsiornermullu ataatsimiititami siulittaasoq Malene Lynge Inuit Ataqatigiinneersoq oqarpoq.
Inuussutissarsiornermut, aatsitassanut sulisoqarnermullu naalakersuisoqarfik immikkut 420.000 koruuninik aningaasaliissuteqarmat inuusuttut 20-it ilinnialersinnaanissamut periarfisseqqinneqarput. Tasiilami piareersarfik soraarummeersitsisarnermi angusarissaarfiusarpoq. Siorna atuaqatigiit tamarmik ataaseq taamaallaat minillugu karakteritigut naammattunik angusaqarput ilinniakkamik aallartitsinissamut atorneqarsinnaasunik, Tasiilami Piareersarfimmi pisortap Eli Abelsenip nassuiaanera malillugu.