Wednesday, December 6, 2017 - 06:47

Inuusuttunut suliniut Maniitsumi aallartinneqarpoq

Nivé Heilmann suliniummi aqutsisunngorpoq
Assi.: Vagn Hansen
Suliniut Sapiik inuusuttut ilinnialersinnissaannik siunertaqarpoq. Peqatigiiffik Kalaallit Meerartaata aamma Qeqqata Kommuniata maanna Maniitsumi aallartinnissaa isumaqatigiissutigaat.

Suliniutip inuusuttut siunissami periarfissaat takutittarpai - atorluarnissaannullu isumassarsiortittarlugit.  Nunatsinni inuusuttut amerlanerusut sulilernisssaa imaluunniit ilinniagaqalernissaat anguniagaavoq. Suliniullu maanna Maniitsumi ammalerpoq, Qeqqata Kommunia aamma Peqatigiiffik Kalaallit Meerartaata suleqatigiinnissamik isumaqatigiinnerisa kingorna.

- Atuarfik Kilaaseeqqami 9. klassimi atuartut maanna immikkut iliuuseqarfigineqarnissaannut pisariaqartitsigatta Peqatigiiffik Kalaallit Meerartaat saaffigaarput. Atuartut immikkut ikorfartortariaqartut atuarfiup paasivaa, tassanilu Sapiik kivitseqataasinnaasutut nalilerparput, Qeqqata Kommuniani ilinniartitaanermut pisortaq Anna Heilann oqarpoq.

Anna Heilmann Peqatigiiffik Kalaallit Meerartaanni allattoqarfimmi pisortami Nike Berthelsenimit ilalerneqarpoq.

- Sapiik suliffeqarfinnut pulaartitsinernik neqerooruteqarpoq, inersimasunit maanna pitsaasumik atorfeqarlutik inuuneqartunit isumassarsiortitsineq, kiisalu aamma inuusuttunut tamanut siunnersuinermut, Nike Berthelsen oqarpoq.

Sapiik nalinginnaasumik 10. klassinut atorneqartarpoq, kisianni Maniitsumi 9. klassimit aallartinneqassaaq.

Sapiik Nuummi, Ilulissani aamma Qaqortumi ingerlanneqartareerpoq, illoqarfinnilu pingasuni suliniummi sulisoqartarpoq. Maniitsumilu maanna inunnik ilinniartitsisoqassaaq.

Peqatigiiffik Kalaallit Meerartaat Nuummi suliniummik aqutsisumik atorfinitsitseqqammerpoq, taassuma Sapiimmi suliniutit tamarmik ingerlatissavai. Tassani Nivé Heilmann toqqarneqarpoq, januaarip aallaqqaataani aallartissalluni.

Nivé Heilmann ilinniartitsisuuvoq, tamatuma saniatigut kalaallit ngo'inik meeqqanut ilaqutariinnullu misilittagaqarluarpoq, kingullermik Blå Korsimi. Taanna Nuummi Oles Varehusimi allaffeqassaaq, tassanngaanniillu Nunatsinni Peqatigiiffik Kalaallit Meerartaasa suliniutaasa sinneri ingerlanneqassapput.

Suliniut Sapiik Peqatigiiffik Kalaallit Meerartaasa 2008-mili ingerlataraa, taamaattumillu inuusuttut 800-nit amerlanerusut suliniut iluaqutiginikuuaat.

Læs også

savalimmiunit aalisarnermik aaqqissuusseqqinneq
Seneste nyheder / Nutaarsiassat kingulliit