festivali

Inuusuttunut nipilersornermik festivali Nuummi aallartinneqarpoq

Nuummi nipilersornermik festivali Inuusuk sapaatiummat aallartippoq inuusuttut ornittarfianni Nuiffimmi. Festivali imigassartorfiussanngilaq kikkunnullu tamanut ammasuulluni

Sverigemit Bellgate People Inuusuk Festivalimi iilaatigut tusarnaartitsissapput

Sisimiuni Arctic Sound naammasseqqammerpoq, nipilersornermillu festivali alla aallartinneqarluni.

Tassami Nuiffimmi nipilersornermik festivali aallartinneqarpoq. Festivali Nuummi ingerlanneqartoq Nuiffimmit aaqqissorneqarpoq, tassani nipilersortartut ilisimaneqartut ilisimaneqarpianngitsullu tusarnaartitsisassapput. Nipilersortussat ilaat nunanit allaneersuupput.

Small Time Giants ilaatigut nipilersussapput kiisalu aamma nipilersoqatigiit Sverigemeersut Bellgate People aamma tusarnaartitsissallutik. Taakku Sisimiuni aamma nipilersoqqammerput. Arctic Winter Gamesimi ilisarnaatitut nipilersuutigineqartussaq Small Time Giantsimit nipilersuutigineqartussaasoq nalunaarutigineqaqqammerpoq.

Tamanut ammasoq
- Tulleriit, Katuma aamma Rikka festivalip aallartinnerani nipilersoqqaartuupput. Pavia Geisler ajoraluartumik tusarnaartitsinissani taamaatiinnarpaa, aamma tusarnaartitsisoqarnerani atortorissaarutitigut ajornartorsiuteqartoqalaarpoq. Kisianni tusarnaartitsisut nuannarineqarluarput, festivalimi aaqqissuisoq Nuiffimi Angajo Lennert-Sandgreen Napap tusagassiutinut nalunaarutaani oqarpoq.

Nipilersornermik festivali ulluni sisamani ingerlanneqassaaq. Tulleriit, Katuma, Zikaza, Qarsoq, Rikka aamma Four Tupilaks ullumi ataasinngornermi tusarnaartitsissapput. Aamma kikkulluunniit tusarnaartitsinissamik periarfissinneqassapput.

Festivali imigassartaqassanngilaq aamma kikkulluunniit peqataasinnaapput isernerlu akeqartinneqarnani. Tusarnaartitsinerit nalunaaqutaq 18.30 aallartittassapput nalunaaqutarlu 22-ip missaani naammassisassallutik.

Pilersaarutit:

  • Sapaat apriilip aqqaneq aappaat: Tulleriit, Katuma, Pavia Geisler aamma Rikka
  • Ataasinngorneq apriilip 13-at: Kikkulluunniit tusarnaartitsisinnaapput
  • Marlunngorneq apriilip 14-at: Qulleq, Four Tupilaks, Bellgate People aamma Small Time Giants
  • Pingasunngorneq apriilip 15-at: Nuif Rappers, Illu Rappers aamma freestylebattle
  • Sisamanngorneq apriiip 16-at: Hans-Peter N. Bay, Nuutit, Qarsoq aamma Zikaza

Nipilersornermik festivali Napamit Inuit Quality Clothes of Greenlandimiillu aningaasaliiffigineqarpoq.

Inuusuk festivalimi pisut Napamit allaaserineqartut suleqatigiittoqarneratigut Sermitsiaq.AG-mit saqqummersinneqarput.

Powered by Labrador CMS