Inuusuttunut inissiisarfik matoqqasoq nutaaq

Siunissami inuusuttut 18-it inorlugit ukiullit inersimasut pinerluttut ilagalugit pinerluuteqarsimasunut inissiisarfimmut inissinneqartarunnaassapput.
Aningaasanut ataaatsimiititaliap sisamanngormat akuersissutigaa inuusuttunut 18-it inorlugit ukiulinnut ulloq unnuarlu inissiisarfimmut matoqqasumut aningaasaliissuteqartoqarnissaa. Tamanna takuneqarsinnaavoq ilaqutariinnut inatsiseqarnermullu Naalakkersuisoqarfimmit tusagassiorfinnut nalunaarummi.
Ilaqutariinnut inatsiseqarnermullu Naalakkersuisoqarfik illuuteqareerpoq, siunertamut tamatumunnga atorneqarsinnaasumik. Illu ullumikkut Sisimiuni Qasapermiut ilagaa, taamatut paasissutissiivoq naalakkersuisoqarfimmi pisortaagallartoq Lene Rohmann Hansen, tusagassiorfinnut nalunaarutikkut.
Naalakkersuisoqarfik maannangaaq sulisussanik atorfinitsitsiortulereerpoq, forstanderimik, perorsaasunik ikiortinillu. Naatsorsuutigineqarpoq inissiisarfik atulissasoq sulisunik piginnaasalinnik atorfitsitsitsisoqaannavissoq.
Ilaqutariinnut inatsiseqarnermullu Naalakkersuisup Martha Lund Olsenip nuannaarutigaa eqqissiallaatigalugulu inuusuttut nunami pinerluuteqarsimasunut inissiisarfinnut inersimasut pinerluttut akornannut inissinneqartarunnaarnissaat, perorsaanikkulli neqerooruteqarfimmut inissinneqartalissallutik.
Pinerluuteqarsimasunik isumaginniffik malillugu ukiuni kingullerni tallimani meeqqat inuusuttullu 17-it, 15-iniit 17-inut ukiullit, piffissami sivikinnerusumi sivisunerusumiluunniit tigummineqartarsimapput. Inuusuttut tamakkua nunami ulluunerani unnuakkullu meeqqanut inuusuttunullu inissiisarfinnut inissinneqarsinnaasimanngillat, namminerminnik avatangiisiminnilluunniit ulorianartorsiortitsisarmata, taamaattumillu tamakkununnga inissinneqarsinnaanatik, naalakkersuisoqarfimmi pisortaagallartoq Lene Rohmann Hansen tusagassiorfinnut nalunaarummi allappoq.
Taassuma ingerlanneqarnera namminersorlutik oqartussat isumagissavaat. Aningaasalerneqassaaq ataasiakkaat inissinneqarneranni kommunit akiliutaasigut.
Naalakkersuisoqarfik atorfinitsitsiortulereerpoq, forstanderimik, perorsaasunik ikiortinillu. Naatsorsuutigineqarpoq inissiisarfik atulissasoq sulisunik piginnaaasalinnik atorfinitsitisoqaannavissoq, Lene Rohmann Hansen paasissutissiivoq.