AWG
Inuusuttunik AWG-mi aliikkusersuisussanik ujarlertoqarpoq
Napa erinarsortartunik, nipilersortartunik, qitittartunik isiginnaartitsisartunillu inuusuttunik, Arctic Winter Gamesimi aliikkkusersuisussanik, ujarlerpoq. Aamma piukkunnartorsiortoqassaaq
Arctic Wnter Gamesimi, aappaagu marsimi Nuummi ingerlanneqartussami, aliikkusersueqataarusuppit?
Kalaallit Nunaanni Nunani Avannarlerni Piorsarsimassutsikkut Attaveqaat, Napa, inuusuttunik unammiuaarnerni aliikkusersueqataarusuttunik ujarlerpoq.
– Isiginnaagassiani erinrasorneq qitinnerlu ilaassapput. Nipilersornermik, qitinnermik erinarsornermillu isiginnaagassiaq tuluttooq kalaallisoorlu torrallataassaaq, Napami suliniutinik ingerlatseqataasoq Najâraq Egede tusagassiorfinnut nalunaarutikkut oqarpoq.
Piukkunnartorsiussapput
Arctic Winter Games aallartinnginnerani inuusuttut sungiusassapput, taamaattumillu februaarip 22-ata missaani katersuuteriissallutik.
Soqutiginnittut Napamut saaffiginnissinnaapput immersugassarlu immerlugu atiminnik, telefonimik normuannik oqaluttuaralugulu suna kakkaffiginerlugu aamma sooq peqataarusunnerluni. Inuusuttut sineriammiittut Skype imaluunniit Facetime atorlugu piukkunnartorsiorneqassapput.
– Nukappissanik nivissanillu 13 aamma 19 akornanni ukiulinnik Kalaallit Nunaannit tamarmeersunik ujarlerpugut, nipilersorluni isiginnaartitsinermi peqataarusuttunik. Isiginnaagassiap katiternera suliarujussuuvoq, naammassereerpalli misigisassaassaaq inuunermi puigukkiussassaq, ilitsersuisoq Kristian Mølgaard kaammattuivoq.