ammaaneq

Inuusuttuaqqat pinerluuteqarsimasut inissiisarfissaannik Sisimiuni ammaasoqartoq

Inuusuttuaqqanut pinerluuteqarsimasunut isumaginninnikkut perorsaanikkullu tunngavilimmik Sisimiuni inissiivissamik ammaasoqassaaq

- Inuusuttuaqqat inersimasunit pinerluttunut ingalassimatinneqarnissaminnut sunnernerlunniarneqartannginnissaminnullu pisinnaatitaaffeqarput, Ilaqutariinnermut Inatsisinillu Atuutsitsinermut Naalakkersuisoq Martha Lund Olsen Siumut oqarpoq

Piffissami sivitsulersumi inuusuttuaqqanut pinerluuteqarsimasunut isumaginninnikkut perorsaanikkullu tunngavilimmik inissiivissamik nunarput amigaateqarsimavoq.

Inuusuttuaqqanut pineqaatissinneqarsimasunut pinerluuteqarsimasunullu 15-niit 18-nut ukiulinnut inissiivissamik Naalakkersuisut pisortatigoortumik ullumi ullup qeqqanut atoqqaarfissiortitsisinnaanngorput.

- Inuusuttuaqqat inersimasunit pinerluttunut ingalassimatinneqarnissaminnut sunnernerlunniarneqartannginnissaminnullu pisinnaatitaaffeqarput, taamaattumillu pineqaatissinneqarsimanertik pissutigalugu inersimasut pineqaatissinneqarsimasut akornanniittariaarullutik, Ilaqutariinnermut Inatsisinillu Atuutsitsinermut Naalakkersuisoq Martha Lund Olsen Siumut tusagassiutinut nalunaarummi oqarpoq.

Inissiivik Sisimiuni inissisimasoq katillugit arfineq pingasunik inissaqarpoq, immikkoortoq isumannaallisagaq sisamanik inissaqarluni immikkoortortarlu ammasoq aamma sisamanik inissaqarluni.

Inuusuttuaqqat immersorluarneqassasut
Naalakkersuisut pingaartippaat meeqqat inuusuttuaqqallu pinerluuteqarsimasut isumaginninnikkut inatsisitigut FN-illu meeqqat pisinnaatitaaffii pillugit illersorneqarnissaat.

- Pingaaruteqarpoq inissiinerit inuusuttuaqqat pisariaqartitaannik sinaakkutaqartumik ingerlannissaat. Inuusuttut timimikkut tarnimikkullu toqqissimasunngornissaminnut piumassuseqalersinneqarnissaminnut pitsaasumillu siuariartuuteqarnissaminnut ikiorserneqarnissaminnut neqeroorfigineqarsinnaassapput. Taamaaliornikkut inuusuttuaqqat ulluinnaasa imaqarluartumik immerneqartarnissaat siunertarineqarpoq, sammisaqartinneqartarnerisigut attavittaartittarnerisigullu, pineqaatissinneqarsimanertik naammassigunikku nammineersinnaassuseqarlutik inuiaqatigiinnut uteqqinnissaat siunertarineqarmat, Martha Lund Olsen oqarpoq.

Powered by Labrador CMS