nalunaarusiaq
Inuusuttorpassuit nakuuserlutillu pinngitsaaliisarput
2016-imi inuusuttut 19-it ataallugit ukiullit akornanni pinerluttulerinermut inatsimmik unioqqutitsinerit tamarmiusut 20 procentii nakuusernermut kinguaassiutitigullu atornerluinermut pinerlunnerupput.
Malugiuk: Allaaserisap siullermik saqqummiunneqartup aallarniutaa aallanngortinneqarpoq, aaqq.
Tamanna Kalaallit Nunaanni politiit ukiumut nalunaarusiaanni, politimesterip Bjørn Tegner Bayip marlunngornermi saqqummiussaani tamanna takuneqarsinnaavoq.
- Kisitsisit atorlugit nassuiaasiornermi pitsanngoriaatituaq tassaavoq inuusuttut pinerluttartut amerleriannginnerat. Killormoortuanik pinerluuteqartartut ikilerialaarnerat paasivarput, politimesteri ilisimatitsivoq.
''Ernumanarluinnartoq''
Inuusuttut sunik pinerluuteqartarnersulli kisitsisit misissoraanni politimesterip oqarneratut ''ernumanarluinnarpoq''.
Aamma atuaruk: Arnat amerlanerusut pinngitsaalineqartarput meeqqallu eqqunngitsuliorfigineqartarlutik
Nakuusernerup kinguaassiutitigullu atornerluinerup ingasannerpaat saniatigut, politimesterip ''pisuttorniarluni pinerluuteqarnerit'' oqaatigai.
Pisuttorniarluni pinerluuteqarneq
- Pisuttorluni pinerluuteqarnerit inuusuttut 19-it ataallugit ukiullit akornanni qiviaraanni, tassa suliat tamarmiusut 61 procentiisa affaat illumut tillinniarnermut tunngasuupput. Tamanna eqqarsarnarpoq, inuusuttullu ernumassutigisagut iliuuseqarfiginiarlugit aalajangerpugut, politimesteri oqarpoq.
- Illumut iserluni tillinniarnissaq pisariuvoq. Pisuttorluni tillinniarneq pisiniarfinni mamakujuttunik imaluunniit mobiilimik tillinnermik takorloorneqartararluarpoq, Bjørn Tegner Bay oqarpoq.
Aamma atuaruk: Politiit: Pinerluuteqartut 2016-imi amerleriarneranni pitsanngoriaat ataasiinnaavoq
- Qularnanngilaq inuusuttut atugarliortupilussuit pineqartut. Ajornartorsiut inuuniarnermi unammilligassanik tuniliaquteqartoq paaseqqiinnarparput, politimesteri Sermitsiaq.AG-mut oqarpoq.
Sakkortuumik eqqugaasartut
Inuusuttut 19-it ataallugit ukiullik eqqugaasut qiviaraanni, taskimik imaluunniit sikkilimik tillinnertik pissutigalugu kisitsisit atorlugit nassuiaasiami takussaanngillat. Illuanik taakku inuusuttut kinguaassiutitigut pinngitsaalineqarsimasut imaluunniit nakuuserfigineqarsimasarput.