Inuusuttoq pikisitsisoq Siumumut ilannguttoq

Kalaallit Nunaata siunissaa pillugu filmimik piviusulersaarusiamik Kalaaleeraq Møller Andersen upernaaq imminut malunnaateqartitsivoq. Sisimiuni GUX-imi atuaqatini marluk peqatigalugit filmiliorput, tassani Nunatta namminersulernissaa sammineqarpoq.

Atuaruk: GUX-imi ilinniartut Nunatta siunissaa pillugu piviusulersaarummik filmiliortut

Taassuma maanna nipini tusaaneqarnissaa erseqqarissisinniarlugu taamaammat politikkikkut tunngavissarsiorpoq.

- Nuna manna nammineq nunagalugu, kisitta nunagalugu misigerusuppaara, inuusuttoq angut taanna pimoorussilluni oqarpoq.

Lars-Emil attortittoq
Siumumut ilaasortanngornissani partiip inuttaannut tupaallaatissanngorlugu piareersarsimavaa. Filmip 'Kalaallit Nunaata Siunissaata' naggataamik Uummannami takutinneqarnerata kingorna ilaatigut Lars-Emil Johansen unnukkorsiornissamut qaaqqusimavaa. Lars-Emil Johansen filmimi peqataavoq, takutinneqarneranullu angalaqataalluni.

Atuaruk: Nunatta siunissaa pillugu filmi oqallisissiaq Ummannami takutinneqassaaq

Kaaleeraq Møller Andersenip unnukkorsiornermi ilaasortanngornermut allakkani saqqummiuppaa.

- 1977-imiilli anguniakkat aallartinneqartut angujumallugit suleqataaffigiumallugit, taamaattumillu Kalaallit Nunatta namminiilivinnissaa angujumallugu suleqataanissara neriorsuutigaara, taanna ilaatigut allappoq.

Lars-Emil Johansenip taassuma alloriarnera ersarissumik attortiffigaa.

- Misigisaq imaannaanngitsoq, taanna sapaatiummat Facebookimut allappoq, tassanilu aamma nalliuttorsiorpalaartitsinermit assimik ilanngussivoq.

Partii arlallit eqqarsaatersuutigigaluarai
Naak Kaaleeraq Møller Andersen ilaqutariinnit Siumukkormiuneeraluarluni, tassani angajoqqaavi taakkulu angajoqqaavi partiimut ilaasortaagaluartut, toqqaanera pisussaannartut inngilaq. Oqariartuutimi anninnissaa tassunga pingaartuuvoq.

- Politikkikkut tunngaveqanngikkaanni, isummanik tusagassiorfitsigut oqariartuutinik saqqummiussiniarneq ajornarpoq, taanna oqarpoq.

Demokraatit aamma Partii Naleraq isumaliuutersuutigisimavai, kisianni Inatsisartuni ilaasortaatitakimmata toqqanngilai. Partiini annerusuni Siumut toqqarpaa, partiini pisoqaanertut sivisunerpaamik Nunatta namminiilivinnissaanut tamaviaaruteqarsimanerat pissutigalugu.

Kim Kielsenimik isornartorsiuineq annertooq
Tamanna aamma pissutigalugu partiip maanna siulittaasorisaa Kim Kielsen naammagisimaarpallaanngilaa.

- Naalakkersuisuni siulittaasorisimasatsinni taanna pitsaannginnerpaagunarpoq, taanna oqarpoq.

- Taassuma namminersulivinnissamik sulissuteqarneq annertuumik unikaallatsippaa.

Suleqatigiinnissamik kissaateqartoq
Kaaleeraq Møller Andersenip Siumumut ilaasortaanini partiinut allanut illuatungiliuttutut isiginngilaa, killormoortuanilli isigaa.

- Anguniagaq taanna angussagutsigu ataatsimoornerusariaqarpugut. Tamanna partiit akornanni aamma innuttaasut akornanni pisariaqarpoq, taanna oqarpoq.

Partiini tamani minnerpaamik ataatsimik namminersulivinnissamik ilungersuussaqartumik nassaarniarluni taanna takorluugaqarpoq.

Taassuma immaqa suleqatissat siulliit nassaareriaannaavai, tassa Aqqaluaq B. Egede (IA) aamma Hans Enoksen (PN), taakku kingullermik sapaatip akunnerata naanerani kingullermi Kalaallit Nunaat namminersortuunissaanut siammasissumik suleqatigiinnissamut kajumissaaruteqarput.

Ukiut tallimat qaangiuppata namminersortunngorneq
Kalaallit Nunaat tuaviornerpaaq atorlugu namminersulivinnissamut piareersassasoq, Kaaleeraq Møller Andersen isumaqarpoq. Ullorisassaalu taagamiuk, peqqusaarluni ilisimavaa.

- Kalaallit Nunaat 21. juuni 2021 namminersulivilluni nalunaaruteqassaaq, taanna oqarpoq.