kajumissaarut

Inuussuttoq aallarnisaasoq politikerinut: Ilissi ajornartorsiutaavusi!

JJ Lennert-Sandgreenip politikerit inuusuttut aamma aallarnisaanermut anersaaq ilaginnaraat bloggimi allaaserinnilluni sakkortuumik isornartorsiorpai

Jens-Jakob Lennert-Sandgreenip (JJ Lennert-Sandgreenitut ilisarisimaneqartup) nunatsinni pissutsit naammagisimaanngilai.

Tamanna nittartakkami bloggikkut ilanngutaasiaani ippassaq saqqummiussaani atuarneqarsinnaavoq.

Taassuma allakkani qulequtsersimavaa 'Inuusuttuunerma naajartornerani ammasumik Kalaallit Nunaata politikerianut allagaq', tassa kalaallinut politikerinut inuusuttuunerma naggataani allakkat ammasut.

Amigartooruteqarneq
Oqariartuutillu erserissut politikerinut tusarliunniarpai.

- Tamassi, tassa politikerit tamaavissi kukkuvusi. Periarfissaqarpusi/periarfissaqarsimagaluarpusi, taanna ilanngutassiamini takisuumi ilaatigut allappoq.

Atuaruk: Binzer: Siunissamik pilersitsiniarluta sorlatsinnut utissaagut

JJ Lennert-Sandgreenip aallarniutigalugu tunisat pisiallu oqimaaqatigiinneranni amigartooruteqarujussuarneq unnersuuteqarpoq, taanalu Kalaallit Nunaata akunnikkaartumik annertusiartortittarpaa, akunnermut 22.606 koruuninik, nammineq naatsorsuinera naapertorlugu.

'Sinaakkutit ajorsarfiusut'
Taamatullu ineriartornerup iluarsineqarnissaanut tunngatillugu politikerit annertuumik sumiginnaasut taanna isumaqarpoq.

- Inuiaqatigiinni maanna sinaakkutigisagut atorlugit ineriartortoqarsinnaanngilaq, taanna allappoq, taakkulu 'sinaakkutit ajorsarfiusunik' taallugit.

JJ Lennert-Sandgreen aallarnisaasuuvoq, assigiinngitsunik smartphonesinut appinik ineriartortitsisimavoq. Tassungalu atatillugu 'sinaakkutit ajorsarfiusut' oqaatigisani naapissimavai.

- Kalaallit Nunaanni inuusuttuulluni ineriartornermik pilersitserusulluni anguniagaqarluni nuanninngilaq. Pikkunaatsorujussuuvoq. Arlaleriarlunga Kalaallit Nunaanni peroriartorneq perloqqussutaasoq eqqarsaatigalugu malugileriasaartarpara, tassami Nunarput pisariaqanngitsunik aporfissaqangaarmat!

'Sooq taama kukkutigaasi'
Taamaammallu ima inerniliivoq:

- Taarsiullugu anguniakkakka imminullu ineriartortinniarlunga unammilligassakka nunani allani ujartortarpakka, Kalaallit Nunaat aamma nunatsinni inuussutissarsiornermut eqqarsarsartariaaseq inuusuttunut periarfissaqartitsinngimmat.

Atuaruk: Nunatsinni aallarnisaaneq suli atugaavallaanngilaq

Inuusuttorlu kamattoq qinikkanut erseqqissumik oqariartuuteqarpoq:

- Ukiut qulikkaat kingulliit qiviaraanni: Sooq taama kukkutigivisi? Imminut qiviaritsi... Partiit puigorlugu, naalakkersuisoqatigiinni imaluunniit illuatungiliuttuni ilaanerlutit puigorlugu. Naalakkersuisuunerit, Inatsisartuunerit imaluunniit qinigassanngortittuunerit puigorlgug. Imminut qiviaannaritsi. Suisiuna???

Ilanngutassiaq tamaat uani qallunaatoortoq atuaruk.

Taassuma uteqattaarlugu aallarnisaanermut anersaavimmik, nunamut isertitanik pilersitsinermik siunertaqartumik siuarsaasumik politikkimik ujartuivoq.

Kisianni politikkip taama ittup pivisunngornissaa JJ Lennert-Sandgreenip uppernartippallaanngilaa.

- Sunaana ajornartorsiut? Ilissi politikeriuvusi, taanna allappoq.

Powered by Labrador CMS