”Dødens gab”
Inuussutissarsiortut: Politikkikkut aqutsisunik amigaateqarpugut
Kim Kielsenip ukiortaami oqalugiaataa oqaasertaliorluagaq politikkikkullu isumaqatigiissutit taakkartorneqartut iluatsinngillat. Nunarput unittooqqavoq, inuussutissarsiortut isumaqarput
Iliuuseqartoqarnissaa inuussutissarsiortunit ujartorneqarpoq. Aamma politikkikkut aqutsilluarsinnaasumik akisussaaffimmik tigusisinnaasumik maqaasisaqarput.
Ullumikkut Nuummi aallartitat ataatsimiinneranni 2017-mut nalunaarusiaq Sulisitsisuni (GE-mi) siulersuisunit saqqummiunneqassaaq. Naalakkersuisooqatigiit partiivisa politikkikkut angusaat isornartorsiorneqangaatsiarpoq.
- Unali eqqortuuvoq: Politikkikkut kiisalu inuussutissarsiornermi aningaasaqarnikkut tunngasunik oqallittoqartillugu nutaanik eqqarsarluarsinnaasunik peqarnissaa pisariaqartinneqarpoq. Ukiortaami oqalugiaatip piviusunngortinneqarnissaa imaluunniit naalakkersuisooqatigiinnermi isumaqatigiissutit piviusunngortinneqarnissaat 2017-mi siulersuisut nalunaarusiaanni ilaatigut piumasarineqartutut allaqqapput.
Naak politikerit nuimasut naalakkersuisooqatigiinnermi isumaqatigiissumminni ilaatigut makku anguniagassatut allassimagaluarlugit: ”Naligiinneq. Toqqissisimaneq. Ineriartorneq”, nunatsinnik naleqquttumik ineriartortitsisinnaasimanngillat.
- Nunatsinni politikkikkut ingerlatsisoqarnerani ukkatarinninneq pingaartitsinerlu amigaatigineqarput. Sammivilimmik anguniagaqarluartunik minnerunngitsumillu politikkikkut aqutsilluarsinnaasumik aalajangiisinnaassuseqarluartumillu sulisoqarnissaa maqaasivarput.
Nunarsuaq sukkasuumik ineriartortoq
Sulisitsisut malillugit Naalakkersuisooqatigiit nutaat nuna tamakkerlugu politikkikkut naligiissumik ineriartorfiulluartumillu toqqammaveqarlutik sulinissaminnut periarfissaqaraluarput. Sulisitsisulli malillugit taamaaliorsimanngillat.
- Nalunaarusiornerup nalaani tassa 2015-2016-mi aaqqissuusseqqinnissanut misissueqqinnissat eqqortinneqarsimanngillat. Partiit pingasut Naalakkersuisooqatigiileramik isumaqatigiissusiorput tassanilu isumaqatigiissutit ilaat, tassa nunatta aningaasaqarnikkut nukittuumik siumut aallarnissaa maanna aaqqitassaanut ilaalerpoq tassami atugarissaassagutta taamaattoqarnissaa atorfissaqartinneqarmat. Naalakkersuisooqatigiinnermili isumaqatigiissummi ersersinneqartut ilaat tassaavoq nunarsuatsinni sukkasuumik ineriartortoqaraluartoq nunarput politikkikkut unittooqqasoq, nalunaarusiami ilaatigut taama allassimasoqarpoq.
Inuussutissarsiuteqartut isaannit politikerit angorusutaat innuttaasunut sanilliutissagaanni ungasippallaarnerat inuussutissarsiuteqartunit nalilerneqarpoq.
- Naalakkersuisut piviusumik takunnissinnaanngitsut GE isumaqarpoq, imaluunniit taakkununnga piviusut marlussuunerat oqaatigineqarsinnaasoq nalunaarusiami allaqqavoq: Politikki aamma piviusoq.
Navianartumut pisoorneq
Massakkoqqissaaq taamatut inissisimasoqartillugu politikerit navianartumut pisooqqasut inuussutissarsiortunit nalilerneqarpoq; akiligassat isertitanit sukkanerujussuarmik alliartupiluulissapput.
- 2017-mut aningaasaqarnermut inatsit ajoraluartumik aaqqissuusseqqinnermut politikkimut pisariaqartinneqartumut tulluutinngilaq. Aningaasaqarnermut inatsit politikkikkut qajannartumik ingerlaarpoq, tassanilu Naalakkersuisut taarseraattut kiisalu Inatsisartuni aaqqissuusseqqinnissamut tunngasunik taasisoqaraangat aningaasaqarnermut iluaqutaasussaagaluamik avaqqutaarillutik ingerlatsisoqarnerata kingunerisaanik taamaattoqarluni.