kommunimut qinersineq
Inuussutissarsiortoq ilisarisimaneqarluartoq politikkimut sanguvoq
Nicolai Nissen 40-nik ukiulik Godthåb Bryghusimik ingerlatsivillu Heca A/S aqqutigalugu neriniartarfinnik pilersitsisimasoq maanna politikkimut saappoq kommunimullu qinersinissamut qinigassanngortilluni.
Marketingøkonomimik ilinniangarsimasoq aprilip sisamaanni kommunimut qinersinissamut Siumut tunuliaqutsiullugu sassarnini Facebookimini paasissutissiaraa.
- Kommuneqarfik misigissuseqarfigaara ingammik illoqarfik maannnakkut najugara. Isiginnaanginnartoorusunngilanga kingusinaarlungalu isumassarsiortoorusunnanga akisussaaffimmik tigumminninneq pitsaanerutippara. Politikkikkut sunniuteqataanissamut periarfissinneqarnera akueralugu Kommuneqarfik Sermersuumi kommunimut qinersisoqarnissaanut Siumut tunuliaqutsiullugu qinigassanngortippunga, neriniartarfiit ittuat Nuummiittoq taama allappoq.
- Siumut tunuliaqutaralugu qinigassanngortinnera ilisarisimannitsinnik tupaallaatigineqanngilaq. Siumummi inuiaqatigiinnut aningaasanullu politikkiat pitsaanerpaavoq. Naatsumik oqaatigalugu ataavartumik aningaasarsiornikkut siuariartorneq, inuiaqatigiit ineriartornerat akissaqartikkumallugu inuiaqatigiinnilu kikkunnut tamanut pitsaasumik atugassaqartitsisut naligiimmillu periarfissaqartitsisut, Nicolai Nissen, Facebookimini taama allaaserisaqarpoq.
Immiorfissuit unammillerai
Suliffeqarfilertuup eqeersimaartup immiorfissuit Carlsberg Royal Unibrewilu unammilleqqammerpai, unammilleqatigiinnermi eqqunngitsuliorsimasutut unnerluutigalugit. Suliaq Unammilleqatigiinnermut oqartussani ingerlanneqarpoq. Atorfiit assigiinngitsut suliffigisarsimavai ussassaarutilerinermi, pilerisaarineq suliassanillu pilersaarusiornerit ilaatigut eqqaaneqarsinnaallutik Legoland Nuummilu Hotel Hans Egede.
Suliffeqarfilertuup qineqqusaarnini iluatissaneraa qinersisartut aprilip sisamaanni aalajagissuaaat. Apeqqutaaginnarporli qinersinerup unnukkuani champagneamik imaluunniit nammineq immiaaraliaminik skåliissanerluni.