inuunermi atugassarititat
Inuuneq ukiunik arfineq-pingasunik Nunatsinni Danmarkimit sivikinneruvoq
Pujortarneeup, imigassap aamma imminut toquttarnerup kalaallit inuuneqqortussusaat Kinamut aamma Tyrkiamut assingulersippaat
Kalaallit Nunaanni inuuneq artornarsinnaasarpoq. Pujortarneq, atornerluisuuneq aamma imminut toquttartut amerlanerisa agguaqatigiisillugu ukiut inuuffiusartut appasitsippaat.
Arnat angutillu Danmarkimi agguaqatigiisilligu ukiut inuuffigisartagaat ukiuni kingullerni siuariartuinnartut, Kalaallit Nunaannili pakatsinartutut tamanna isikkoqarpoq.
Ukiut 69-it
Angut kalaaleq agguaqatigiisillugu ukiut 69-it inuusarpoq, arnalli ukiuni tallimanik inuuneqqortunerullutik 74-it angusarpaat.
Taamaalillutik danskinut sanilliullutik ukiut arfineq-pingasut inuuffissaraluatik inuuffiginngitsoortarpaat.
- Taamaalilluta Europap kangiani nunani arlalinnisut, Kinamisut, Tyrkiamisut Australiallu inoqqaavinit appasinnerulaamik inissippugut, peqqissutsimut naalakkersuisoq Doris Jakobsen taama oqarpoq.
Misissuineq nutaaq
Kisitsisit misissuinermi 'Qanoq ippugut? - Kalaallit Nunaanni innuttaasut peqqissusaat 2014'-iminngaanneerput, ilaatigut Statens Institut for Folkesundhedip suliarisaanit.
Tassani issittumi peqqissutsimut ilisimatuup Peter Bjerregaardip tupa annertuumik peqqutaasutut tikkuarpaa.
Naak piffinni tamanut ammasuni pujortarneq inerteqqutaagaluartoq aamma tupat akitsuuteqaraluartut innuttaasut 57 procentii ullormut pujortartartuupput. Amerlassusaat annikitsumik appariartorput, Danmarkimili ullormut pujortartartunit 17 procentiusunit suli ungaseqaat.
Imminut toquttarneq
Inuuneqqortussusermut imminortartut amerlanerat aamma apparsaataavoq.
Inuttussuseq naapertorlugu missingersuigaanni Kalaallit Nunaanni imminortartut silarsuaq tamarmi amerlanerpaat ilaanniipput. Ukiut tamaasa inuit 45 aamma 50 akornanniittut imminut toquttarput, amerlanerit angutit inuusuttut.
Atugassarititat artornartut
Peqqinnissaqarfimmit iliuuseqartaraluartoq, ilaatigut pinaveersaartitsinikkut aamma oqarasuaatikkut siunnersuinikkut, statistiski alianartoq appartinneqarsinnaasimanngilaq, illoqarfiillu ilaanni imminoriartarneq ullorsiutaaginnartarpoq.
- Annertuumik iliuuseqartoqarnikuuvoq, kisianni ajornartorsiutip qitia tiguneqanngilaq. Meeqqat amerlavallaat ajornartorsiorlutik peroriartortarput. Kinguaariit arlallit inuuneranni aatsaat iluarsinneqarsinnaavoq, Peter Bjerregaard oqarpoq.
Aamma atuaruk: Piitsuuneq Tunumi atugaaneruvoq