pinaveersaartitsineq
Inuuneq inuuffigiuk!
Imminut toqunneq pinaveersaartitsinerlu ilaqutaasunullu ikiuineq pillugit atuagaq nutaaq saqqummerpoq. Taanna ilaqutaasunit oqaluttuanik killitsinnartunik qulingiluanik imaqarpoq. Nalunaajaataavoq: Oqaloqatigiissutigisiuk
Imminut toqunneq ilaqutaasunullu ikiuineq pillugit atuakkap saqqummersinneqarnera tallimanngormat Naalakkersuisunut ilaasortaq Steen Lynge qaaqqusisoralugu malunnartinneqarpoq.
Imminut toqunnermik pinaveersaartitsineq Naalakkersuisut sammivaat, Nunatsinnilu 2013-2019-imut imminut toqunnermik pinaveersaartitsinermut Nuna tamakkerlugu periutsimi ilaqutaasut pingaarutilittut isigineqareput.
Atuagaq Inuuneq inuuffigiuk imminut toqunnermut pinaveersaartitsinermik ilaqutaasunullu ikiuinermik atuagaavoq killitsinnartoq ilumoortorlu. Tassani imminut toqussimasut ilaqutaat siusinnerusukkullu imminut toqunniarsimasut qulingiluat killitsinnartumik oqaluttuarput.
Oqaluttuarineqarput maqaasineq, aliasunneq, imminut pisuutinneq, imminut naammaginnginneq, imminut tatiginnginneq, imminuinnaq eqqarsaatigineq, soriarsinnaannginneq - tamarmik nalunaajaatigalugu: Oqaloqatigiissutigisiuk. Ikiorneqarsinnaavutit. Kisimiinngilatit!
Atuakkamik siunertaavoq inuit imminut toqunnissamik isumaliuteqartut inuunermik akeqanngitsumik aqqutissarsiornissaannik kaammattuinissaq. Tamatuma saniatigut atuagaq aamma atorneqarsinnaavoq ilaqutaasunit, neriunartumik allat oqaluttuaannik tuppallersarneqarsinnaallutik, annaasaqareerlutik qanoq inuunerminnik ingerlatseqqissimasunit.
Atuagaq atuagaarniarfinni tuniniarneqalersoq Paarisa sinnerlugu allanneqarpoq tusagassiortunit Heidi Møllerimit Juana Petrussenimillu, grafikerimillu Nina Spore Kreutzmannimit, milik publishing-imillu saqqummersinneqarluni.