Inuttut atugarliortunut eqqissisimaartarfik nutaaq

Nuummi meeqqat inuusuttullu illuat Mælkebøtten ANT-Fonden-imit juunimi 500.000 koruuninik tunineqarpoq. Tunissutit atorneqassapput nunaqarfimmi Kapisilinni illumik ukioq kaajallallugu atorneqartartussamik pisinermut

Kirsten Ørgaardip qularutiginngilaa illu nutaaq kikkunnut tamanut iluaqutaassasoq.

Nuummi Mælkebøtten-ip ineriartornera ingerlaqqippoq, ANT-Fondenip juunimi meeqqat inuusuttullu illuannut 500.000 koruuninik tunisinerata kingorna.
Tunissutit atorneqassapput nunaqarfimmi Kapisilinni illumik pisinermut, tassani meeqqat inuusuttullu 3 aamma 17 akornanni ukiullit nutaamik eqqissisimaartarfittaassallutik.
– Tunissutit kusanaqisut nuannaarutigisorujussuuvagut, taamaasillutalu Kapisilinni illutaarnissatsinnik sivisuumik kissaatigisarput piviusunngortissinnaalerparput, Mælkebøttenip pisortaa Kirsten Ørgaard oqarpoq.
Iluaqutaalluassaaq
Taassuma qularutiginngilaa illu kikkunnut tamanut iluaqutaalluassasoq.
– Mælkenbøtten ammarmalli paasisimavarput meeqqat ilarpaalui, ulloq unnuarlu immikkoortoqarfitsinnut inissinneqartartut, avatangiisini atugarliorfiusuni, meeqqanut inuusuttunullu naleqqutinngitsuni, inuusut, tamakkualu ineriartornerannut pitsaanngitsumik sunniuteqartartut. Amerlasuutigut meeqqat inersimasunik attaveqarpiarneq ajorput, namminiiginnartinneqartarput meeqqat allat taamatut atugarlioqatitik peqatigalugit aqqusinermiiginnartarlutik. Inuttut tarnikkullu artukkerneqarsimasorujussuupput, uagutsinnillu Meeqqat Inuusuttullu Illuannit qimaakulasarput avatangiisit atugarliorfiusut orninniarlugit.
– Kalaallit Nunaata pinngortitarsua alianaatsoq meeqqanut taamaattunut perorsaavigissallutu tarnikkullu kartsorsaavigissallugu naleqqulluarpoq, ulluinnarni pissusilersornerisa pitsaanngitsut qaangertinniarneranni, Kirsten Ørgaard oqarpoq.
Naatsorsuutigineqarpoq illu 2014-imi atoqqaarfissiorneqassasoq, illulu meeqqanut arfineq-pingasunut inersimasunullu marlunnut inissaqassaaq.

Powered by Labrador CMS