Polar Nanoq
Inuttat unnerluutigineqanngillat
Kilisaat ullumi Islandimut utissaaq. Politiit suleqatigivagut, Polar Seafood taama oqarpoq
Kalaallit kilisaataat Polar Nanoq ullumi Islandimut tikissaat. Islandimi politiit arnap tammarneranut atatillugu paasisaqarusupput.
Kilisaat Polar Nanoq arfininngormat Islandimiik aallarpoq, ulloq taanna 20-nik ukiulik Birna Brjánsdóttir maqaasineqalerpoq.
Tusaratsigu Islandimi politiit arnap ujaarineqartup kilisaatillu Polar Nanoq imminut attuumassuteqartut kilisaat piumaffigivarput Islandimut utissasoq, ingerlaannarlu oqatussaasut attaveqarfigalutigit, taama tusagassiuutinut paasissutissiivoq imarsiortut naalagaat Jørgen Fossheim Polar Seafoodiminngaanneersoq
Kisimiilluni aqqusinikkut pisuttoq
Islandimi politiit paasisimavaat arfininngornermi ullaakkut nalunaaqutaq 05:30 aamma 06:00 missaani 20-nik ukiullip illoqarfiit pigaarnersaanni angalaarnera.
Nakkutiginninnermi atortut atorlugit politiit paasivaat Reykjavíkip ilaani arnaq kisimiilluni pisuttoq. Piffiup ilaani angutit marluk naapissimavai, taakkuli politiit oqaloqatigerusuppaat.
Telemi paasissutissat atorlugit politiit paasivaat Birna Brjánsdóttir piffissami sivikitsumi talittarfiup tungaanut ingerlaartoq, mobiltelefonialu arfininngunngitsiartoq qamilluni.
Inuttat biiliat arnap eqqaani takuneqarpoq
Tassunga atatillugu paasineqarpoq biili attartortangaq aappalaartoq Kia Rio.
Biili takuneqarsimavoq arnap inuusuttup ingerlaarfiani ilimanarlunilu talittarfiliaassimassagaat. Kisianni uppernarsarneqanngilaq ilumut biili taannaasoq, immiussanimi nummerplade iluamik atuarneqarsinnaanngilaq.
Polar Nanumi inuttat biilimut assingusumut attartorsimasutut allaqqapput, politiilli paasiniaanertik killisaammut sammitilersimavaat.
Tusatsiakkat arlaqarput arnap tammarneranut
Pisoq alianartoq pillugu islandermiut nutaarsiassaqartitsiviini tusatsiakkat aallaavigalugit saqqummiisoqarnera Polar Seafoodip erseqqissaassutigaa. Erseqqissaatigissavarput pisumut atatillugu uppernarsaateqanngimmat taamaammallu inuttat unnerluutigineqaratik. Islandimi nutaarsiassaqartitsiviit tusatsiakkat eqqoriaanerillu aallaavigalugit paasissutissiisaqattaartillugit erseqqissumik qanoq pisoqarsimaneranik inerniliisoqarsinnaanngikkallarpoq. Suliap naammassineqanngimmat oqaaseqarfigeqqissinnaanngilarput. Erseqqissaatigissavarpulli umiarsuaateqarfiup inuttat tapersersormagit kiisalu ikiorneqartariaqartut ikiussallutigit, imarsiortut naalagaat Jørgen Fossheim paasissutissiivoq.
Kamippaat talittarfimmi nassaarineqartut
Birna Brjánsdóttir tammartingani kamippaat Dr. Martensinik mærkillik atorpai. Kamippaallu taama mærkillik nassaarineqarput tusangassiuteqarfiilli arlallit paasissutissiipput talittarfimmi nassaarineqartut.
Visir.is malillugu Islandimi politiit tusagassiuutinut nalunaaruteqarnerminni paasissutissiipput suli killisiuisoqaranilu unnerluutiginnittoqanngitsoq arnap tammarneranut atatillugu, aammattaaq Polar Nanumi inuttai.