Polar Nanoq
Inuttat toqutsisimasutut unnerluutigineqartut
Islandimi politiit tingummingallarneqartunut killisiuinerat annerusumik paasissutissanik angusaqarfiunngilaq. Politiilli pineqartut toqutsisimasutut unnerluutigineqartut uppernarsarpaat.
Birna Bjránsdóttir inuartarineqarsimasinnaanera politiit saqqummiuppaat
- Ajoraluartumik toqusimasinnaanera ilimanaateqarpoq, pinerluttoqarsimanermi aqutsisuusoq Grímur Grímsson ibl.is-mut oqarpoq.
Ujaarineqartoq sapaatip akunningajaa uumasimasinnaanerminut takussutissaqanngimmat toqusimasinnaanera ilimanaateqarsinnaasoq oqaatigaa.
Polar Nanumilu inuttat marluk tigummingallarneqartut toqutsisimasutut unnerluutigineqartut oqaatigalugu.
RUV.is aamma ibl.is taama paasissutissiipput. Politiit toqutsisimanermut paragraf 211 naapertorlugu unnerluutigineqartut uppernarsarpaat.
Pineqartulli Birna Bjránsdóttirs 20-nik ukiullip periarfeerunneranut attuumassuteqannginnerarlutik suli pisuunnginnerarput.
Tingummingallarneqartut marluk ullumi politiinik killisiorneqaqqikkaluarput, annerusumilli paasissutissanik pissarsiffiusimanani.
Pasineqartut Birna Bjránsdóttir ilumut naapissimaneraat politiit qulakkeerlugu oqaatigisinnaanngikkallarpaat.
- Taavami naapissimasinnaavaat? RUV-ip tusagassiortua aperivoq.
- Aap, taama politiit oqaaseqartartuat Einar Guðberg Jónsson akissuteqarpoq.
Nakkutilliinermut filmiliuummi tingummingallarneqartut angutit marluk 20-nillu ukiulik takuneqarput. Kisiannili ilumut taakkua naapissimanerannik takussutissaqarani.
Arnaq biilimi Kia Riomi pasineqartut attartorsimasaanni ilaasimasinnaasoq politiilli ilimagalugu oqarput.