avaleraasartoortassat
Inuttat kajumissaaruteqarput: Sooruna piumaneqanngitsugut?
Kilisaammi Ilivileq GR 2-201-imi inuttat sooq avaleraasartoorniarsinnaannginnerlutik tupigusuutigaat, Sermitsiaq.AG-mullu kajumissaarummik nassiussipput.
- Kilisaammi 28-uvugut, tamattalu Kalaallit Nunaanni akileraartartuuvugut. Apeqqutaaginnarporlu kilisaatini nunanit allaneersorpassuarnit inuttat Kalaallit Nunaanni akileraartarnersut. Taamaassimappallu akileraarutigisartagaat uagut akileraarutigisartakkatsinnit nalitunerusimassapput, inuttat tupigusuttut aaqqissuisoqarfimmut taama allapput.
Kilisaatit nunanit allaneersut qulingiluat
Maanna piffissami kilisaatit avaleraasartoorniartut Tunumiittut qulingiluaasut taakku paasivaat, assimillu uppernarsaammik aaqqissuisoqarfimmut nassiussipput.
- Umiarsuarnit taakkunannga minnerpaamik sisamat Royal Greenlandimit attartorneqarput, taakkunanilu kalaallinik ilaasoqanngilaq. Taavalu Savalimmiormiut, Islandimiut aamma Russit umiarsuaat tassaniipput, avaleraasartoorniartartut suliffeqanngitsut, annertuumik tupigusuutigineqartumik avaleraasartoortassinneqanngitsut taama ilisimatitsipput.
- Avaleraasartoortassiissutit 12 aamma 13 procentiisa missaata aalisarneqareerput, kilisaatillu siorna ammassassuarniarnertik aggustip qulingata missaani aallartippaat, inuttat ilisimatitsipput, taakkulu pisassiissutit tamakkerneqannginnissaat ilimagaat.
Pisassiissutit agguaanneqarnerat tupigusutsitsivoq
Pisassiinermi Artic Prime Fisheriesip avaleraasartoortassinneqannginnera politikerinik arlalinnik tupigusutsitsivoq, taakku naalakkersuisumut Karl-Kristian Krusemut arlalinnik apeqquteqaateqarput.
Aamma atuaruk: Pisassiineri apeqquserneqartut
Debora Kleist, Michael Rosing aamma Nikolaj Jeremiassen suliaq pillugu politikkikkut qaqippaat, kisianni Arctic Prime Fisheries sooq pisassinneqarsimannginnersoq ersarissumik akissutisinngillat. Tamanna tunuliaqutigalugu pisassiissutinik agguaaneq kinaassusersiunngitsumik aalajangiinermik tunngaveqannginnersoq qularnerup peerneqarnissaa suli iluatsinngilaq.
Debora Kleist siornatigut Sermitsiamut ima oqaaseqarpoq:
- Naalakkersuisut ingerlatseqatigiiffimmut ingerlalluartumut naaggaarnerat paasiuminaapput, ingerlatseqatigiiffimmullu ingerlalernissamut suli qularnartumut akuersissuteqarlutik.
''Isornartorujussuaq''
Tunumi inuussutissarsiornikkut suliniutit nunaqavissunik aalisartunik peqataaffigineqartut pisassinneqannginneq pissutigalugu unittooqqasut isornartorujussuusoq, aviisimut tassunga Nikolaj Jeremiassen aamma oqarpoq.