Polar Nanoq
Inuttat apuunneranni paarineqartut
Kilisaat Islandimut tulammat talittarfimmi piareersimasunik ulikkaarpoq
Polar Seafoodip kilisaataani Polar Nanumi inuttat Islandimut tikimmata Reykjavikip talittarfiani Hafnarfjördur tusagassiortut alakkaasullu amerlaruttormata illersorneqartariaqarsimapput.
Atuaruk: Inuttat pingajuat tigummigallarneqarpoq
Kilisaat arfininngormat Islandimit aallartsimatsiartoq arnaq 20-nik ukiulik maqaasineqartoq nalunaarutigineqarpoq. Marlunngormallu Islandimi politiit kilisaat Islandimut uteqqullugu piumaffigineqarpoq.
Arnaq kilisaatip ungasinngisaaniissimavoq
Arnaq ujaarineqartoq Birna Brjánsdóttir tammaaneqalinnginnermini kilisaatip ungasinngisaaniissimasoq mobiliata attaveqaataatigut paasineqarmat kilisaammi inuttat paasissutissanik ilisimasaqarsimasinnaanerinik pasineqalerput.
Atuaruk: Polar Nanumi inuttat marluk tigusarineqarput
Islandimiut attortisimaqisut ujaarlernermi peqataasut kilisaat unnuaq tikimmat alapernaapput. Tusagassiiuutit najugaqartullu ikigisassaanngitsut niuffiorsimallutik. Kilisaallu talittarfimmut talimmat inuttat pingasut politeeqarfimmut Hverfisgatamiittut killisiorneqartussanngorlutik apuunneqarput. Islandimi nutaarsiassaqartitsiviit arlallit taama allaaserisaqarput.
Ungalut politiillu biilii
Kilisaatit tulaffissaani talittarfiup ilaa ungalunik portusuunik assersorneqarsimavoq, susassaqanngitsut kilisaammukaqqunagit. Ungalullu iluani politiit biilerpassui politiillu piareersimasimallutik.
Inuttat marluk politeeqarfiliaanneqartut kalaaliupput tingusarineqartullu pingajuata innuttaassusaa suli saqqummiunneqarani.
Atuaruk: Birnu Brjánsdóttur suli ujaarineqarpoq
Aqqutaa tamaa malinnaavigineqarput
Tigusaqartut politeeqarfimmut ingerlanneqarnerat islandermiut tusagassiuutaasa malinnaaffigineqarput. Filmiliallu tiimerpaalunnik sivisussuseqartut kilisaatip tikikkiartorneranit tigusarineqartut politeeqarfimmut eqqunneqarnissaasa tungaanut malinnaaffigineqarsimallutik.
Aalisartut unnuaq naallugu Islandimi politiinit killisiorneqartut Visir.is-ip paasissutissiissutigaa.