Tasiilaq
Inunnik isumaginnittut tamaviaarpallaarunnaarnissartik kissaatigaat
Nuna tamakkerlugu inunnik isumaginninnermut siunnersortit, sulinerminni atugassarititatik akuersaagassaannginnerakkatik, ukkatarineqaqqullugit kissaatigeqqippaat
Ilaqutariinnermut, Naligiisitaanermut Isumaginninnermullu Naalakkersisoqarfiup saqqummiuteqammerpaa nalunaarusiaq takussutissiisoq Tasiilami 520-nik inunnik isumaginninnerup iluani meeqqanut inussutuaqqanullu suliassaqartoqartoq. Taakkununngalu sulissisut pingasut kisimik sulisorineqartut.
Nalunaarusiap allaaseraa, tamanna 'naleqqutinngilluinnartunik sulinermi atugassaqartitsisoq'.
Inunnik isumaginninnermut siunnersortit nuna tamakkerlugu kattuffiat 'Niisip' erseqqissaaqqippoq, isumaginninnermut siunnersortinut unammilligassat annertoorsuusut.
Atuaruk: Isumaginninnermut siunnersortit: Atugarinnerulerutta suliat ikinnerulissapput
Politikerit suaartarfigigaluaraat
- Ilisimaqqissaarparput meerarpassuaqarmat ingerlanerluttunik, aammalu siusissukkut aanngajaarniutinik assigisaanillu atuilersimasunik tamannalu peqqutaalluni immikkut sullinneqartariaqartunik. Sullissisut isumaginninnerup iluani suliassaqarpallaanerujussui pissutaaqataallutik naammaginartumik naammassineqarneq ajortut, kattuffik tusagassiuutinut nalunaarummi allappoq.
Tassani erseqqissaatigineqarpoq, arlaleriarujussuarluni politikkerit tamatuminnga saaffigineqartartut, aammalu oqalliseqatigiinnissamut kaammattuisoqartartoq, qanoq ililluni nunatsinni isumaginninnerup iluani ajornartorsiutit iliuuseqarfigineqarsinnaaneri ujartorlugit.
Isumaginninnermut siunnersortit kattuffiata upperilluinnarpaa, sullissisut inunnik isumaginnittoqarfinni sapinngisartik tamaat sullissisartut aammalu suliassatik kivinniartaraat, kisianni suliffimmi atugassaritinneqartut suliassaqarpallaarnerit pissutaaqataallutik pissutsit taamatut ittuuneri nalunaarusiami takussutissiimmata.
- Meeqqanut inuusuttuaqqanullu atugassarititaasut ajorluinnarput, piaarnerpaamik massakkut iliuuseqartoqartariaqarpoq, NIISIP taama oqariartuuteqarpoq.
Nunatsinni massakkut inunnik isumaginninnermi siunnersortitut ilinniarsimasut 240-t missaaniipput, taakkunannga ikittuinnaat isumaginnittoqarfinni kommunini sulipput.
Atuaruk: Isumaginninnermut suliat qummut killilerneqarnissaat siunnersuutigigaat