Toqusoq
Inuk malunnaateqarluartoq toquvoq
Kalaallit Nunaat inummik malunnaateqarluartumik annaasaqarpoq, taanna sorpassuartigut inuiaqatigiinni malunnaateqarsimavoq.
Sanaartugassanik suliaqartartoq aamma aallarnisaasoq, Povl Brandt, marlunngornermi 85-inik ukioqarluni Roskildemi utoqqaat illuanni Himmelevimi toquvoq. Taanna 2010-imi katsorsarneqarsinnaanngitsumik parkinsonimik napparsimalerpoq, ukiunilu marlunni kingullerni Danmarkimi utoqqaat illuanni najugaqarpoq.
Qarmaasoq
Qarmaasutut ilinniagaqarluni Povl Brandt Kalaallit Nunaannut pilluarnermik ujartuivoq, taassuma Betoncentralen aqutarilerpaa, Qajaq Trawlimillu pilersitseqataasuuvoq.
Ukiorpassuarni inuussutissarsiornermi iluatsitinerup taassuma nuliatalu Dudop (Augusta Grethe Kristiane Johnsenip) Dudo aamma Povl Brandtip Aningaasaateqarfiata katillugu 16 millionit koruuninik aningaasaateqartoq pilersinnissaa periarfissanngortissimavaa, taassuma ukiut ingerlanerini ilinniartut Kalaallit Nunaanneersut imaluunniit Kalaallit Nunaannut attuumassuteqartut tunissuteqarfigisarpai.
Suliarpassuit
Sanaartornerup aamma cementiliornerup betoniliornerullu saniatigut Povl Brandt inuussutissarsiornermi amerlasuunik suliaqartarsimavoq, soorlu annertuukkaanik nioqquteqarneq, neriniartarfiit, timmisartortitseqatigiiffik aamma eqqiaaneq.
Ukiuni 27-ni Magasinet piginneqataaffiginikuuaa, piffissami aalajangersimasumi taanna Nunatsinni annerpaasimavoq. Taassuma kilisaataateqarfik Qajaq Trawl A/S pilersippaa, taanna ullumikkut ernerata Søren Brandtip ingerlappaa. Tamatuma saniatigut suliffeqarfinni pisortanit aamma namminersortunit pigineqartuni bestyrelsini ilaasortaaffeqartarsimavoq, taakkunannga ukiuni 30-ni Grønlandsbankenip 1967-imi pilersinneqarneranit, Sulisitsisut pisortaat Brian Buus Pedersen Sermitsiaq.AG-mut ilisimatitsivoq.
Honorær konsuuli
Piffissap ilaani Povl Brandt Kalaallit Nunaannut Canadami honorær konsuuliusimavoq, 1997-imilu Ridder af Dannebroginngorpoq.