Inuk inuuvoq qanorluunniit mikitigigaluaruni

Juliane Henningsen, IA, meeqqanut inuusuttuaqqanullu tunngasuni politikkikkut isumaliutit pillugit Naalakkersuisunut qulinik apeqquteqarpoq. Pingaartumik meeqqanut atugarliortunut tunngasunik

Narsami meeraaqqerivimmi Vivimiittartut. Assiliisoq: John Rasmussen, Narsaq Foto

Ulloq unnuarlu angerlarsimaffiit, siusinaartumik iliuuseqarneq, meeqqanik inissinneqartussanik oqaloqateqarnermi illersuisut, meeqqat angerlarsimaffiinik pilersitsiortornerit il.il.

Inuit Ataqatigiinneersoq Juliane Henningsen paragraf 37 naapertorlugu Naalakkersuisunut aqqanilinnik apeqquteqarpoq. Tamanna pivoq Meeqqat Illersuisuata marsimi 2013-imi misissuinermik "Inuk inuuvoq qanorluunniit mikitigigaluaruni"-mik saqqummersitsinermut atatillugu.

- MIO-p misissuinermini ajornartorsiuteqarfiit pinartut attuumassuteqartullu, meeqqat inuusuttullu inissinneqarsimasut atugaasa pitsanngorsaavigineqarnissaannik immineq isumaliulersitsisut, naalakkersuinikkullu isumaliuutinik iliuuseqarnissanillu pisariaqartitsisut sammisimavai. Ajornartorsiuteqarfiit arlallit ilisarnarput. Soorlu pilersaarusiuussinissanut inatsisitigut pisussaaffiit amigaataanerat kommunenit amerlasuutigut suliarineqanngitsoortartut, Juliane Henningsen tunngavilersuivoq.

Apeqqutai ukuupput:

1) Meeqqat pisinnaatitaaffimminnik ilisimasaqarnerulernissaat qulakkeerniarlugu Naalakkersuisut meeqqanut pisinnaatitaaffinnut atatillugu iliuusissiulersaarpat?
2) Meeqqat angerlarsimaffiup avataanut inissinneqariaannaasut eqqarsaatigalugit maannamut naleqqiullugu oqaloqatigineqartarnissaannut Naalakkersuisut qanoq qulakkeeriniarpat?
3) Meeqqat inuusuttullu angerlarsimaffiup avataanut inissinneqartussanngortut eqqarsaatigalugit illersuisoqarnissaannik qulakkeerisumik Naalakkersuisut sulissuteqarniarpat?
4) Meeqqat illersuisuata martsimi 2013-mi misissuisitsineranit “Inuk inuuvoq qanorluunniit mikitigigaluaruni”-mi isummersuutit sutigut Naalakkersuisunit isumaqatigineqanngillat, aammalu qaqugu qanorlu Meeqqat Illersuisuata isummersuutai naaperiarneqassappat?
5) Meeqqanut inuusuttunullu inissiisarfiit namminersortut pilersinneqarnissaannut tunngaviatigut pissutsit qanoq ittut naammassineqarsimassappat, ullorlu unnuarlu angerlarsimaffiit namminersortut pilersinneqarnissaannut piumasaqaatit qanoq isikkoqassappat?
6) Ulloq unnuarlu angerlarsimaffinnik pilersitsisinnaanissamut isumaqatigiissummik aallaaveqarnissaq Naalakkersuisut ingerlatiinnarniarpaat, imaluunniit Naalakkersuisut ulloq unnuarlu angerlarsimaffinnik namminersortunik pilersitsinermut ingerlatsinermullu tunngasunik Inatsisartunut inatsisissamik siunnersuuteqalersaarpat, tassanilu ulloq unnuarlu angerlasimaffiit pisortatigoortut assigisaannik piumasaqaatitaqartoqassava, tassunga ilaallutik nakkutilliinermut, tamanut ammasumik nalunaaruteqartussaatitaanermut inatsit, suliassanik ingerlassinernut inatsit naammagittaalliutillu?
7) Meeqqanut inuusuttunullu ikiorsiinernut malittarisassat atuuttut naapertorlugit meeqqat inuusuttullu inissinneqartut tamarmik pilersaarusiorfigineqartussaapput. Meeqqat inissinneqarsimasut qassit pilersaarusiorfigineqarsimannginnerat Naalakkersuisut nalunaarutigisinnaavaat? Meeqqat inuusuttullu inissinneqarsimasut tamakkerlutik pilersaarusiorfigineqanngitsoornerisigut kommunit inatsisinik unioqqutitsinnginnissaannut qaqugu qanorlu Naalakkersuisut qulakkeerinninniarpat?
8) Ilaqutariit meerartallit angajoqqaanngortussallu qajannarlutillu sanngiitsut eqqarsaatigalugit siusissukkut iliuuseqarnissamut tunngatillugu iluarsiinissamik Naalakkersuisut eqqarsaatersuuteqarpat, tassani ilaallutik pisussaaffinnut akisussaaffinnullu tunngasut.
9) Meeqqanut inuusuttunullu ulloq unnuarlu inissiisarfinni pisariaqartitsinermut naapertuuttunik ilinniarsimasunik perorsaasoqarnissaa qulakkeerniarlugu Naalakkersuisut qanoq iliuusissiaqarpat? Tassunga atatillugu paasineqarusuppoq, naatsorsuutigisatut tamanna pigineqanngippat, taava meeqqanut inuusuttunullu ulloq unnuarlu angerlarsimaffiini sulisut piginnaanngorsarnissaannik qulakkeerisussamik Naalakkersuisut iliuusissiamik suliassamullu pilersaarusiamik suliaqalersaarnersut, tassa suliassat fagligemik siunissarlu eqqarsaatigalugu naammassineqarsinnaanerat qulakkeerlugu, tamatumalu saniatigut suliassaqarfimmi tassani perorsaanikkut piginnaasat pisariaqartut qulakkeerneqarnissaat eqqarsaatigalugu?
10) Angerlarsimaffiup avataani inissiisoqartillugu meeqqanik ilisimasallit misissuisarnissaat oqaaseqartinneqartarnissaallu eqqarsaatigalugit Naalakkersuisut qanoq siuarsaateqarnialersaarpat?
11) Ulloq unnuarlu angerlarsimaffinnut tunngatillugu misissueqqissaarneq naliliinerlu 10. februar 2010 Deloittemit saqqummiunneqartoq malitseqartinniarlugu Naalakkersuisut suliamut attuumassuteqanngitsunit tamatuma misissuiffigineqarnissaanik aallartitsinissamik pilersaaruteqarpat?

Powered by Labrador CMS