toqqaaneq
Inuit tapersersortaat annertuumik nersorneqartoq
Professor Karla Jessen Williamsonip ilisimatusarnermut tunngasuni suliaqartut nersornaatini pilerigineqarnerpaat ilaat Canadami universitetimi Sakatchewanimi pissarsiaraa.
Taanna qanittukkut atorfimmi qullartinneqarpoq, maannalu ''tenured prfessorimik'' imminut taasinnaanngorpoq. Taamaalilluni universitetimi professoritut atorfia soraarninngornissaata tungaanut atuutissaaq. Professoritut atorfiit amerlanertigut killissaleriikkamik atorfinitsitsinerusarput.
Atorfinitsinneqarnera nersorneqarneralu pillugit Canadami tusagassiorfiit ilisimatusarnermut tunngasumi sulilluarsimasoq apersorsimavaat.
Aqqut takisooq
Aqqut takisimaqisoq taassuma Facebookimi quppernerata takutippaa. Appamiuni aamma Maniitsumi peroriartoreerluni, Maribomi ilinniarnertuunngoreerluni, Skotlandimi Aberdeenimi antropologiimik ilinniareerluni maannalu Saskatchewanimi universitetimi professorinngorpoq, tassani kulturit assigiinngitsup pillugit ilinniartitsisarpoq. Sulinermilu annerpaartaani nunat inoqqaavisa inuiaqatigiinni pisinnaatitaaffii samminerusarsimavai.
''Nuannaartupilussuaq''
Karla Jessen Williamsonip universitetimi professoritut atorfinitsinneqarnini ilaquttani Iqalunni tikeraartillugit paasivaa.
- U. of Saskatchewanimi professoritut ikkutivinneqarninni nalunaarut ernutannguaralu nukarleq nuannaarutigigipputm taanna Facebookimi allappoq.
Katinnikuuvoq marlunnillu meeraqarpoq.