paasisitsiniaaneq
Inuit Sila nutaamik video-liorpoq - taanna takujuk
inuit Sila-p nutaamik paasisitsiniaaneranut aallartisaatitut Inuit Sila kalaallit puisinniarnerat pillugu video-liorpoq
Sermitsiaq.AG-p qanittukkut allanneratut kalaallit puisinik paasisitsiniaaffiat Inuit Sila nutaamik paasisitsiniaalerpoq, tassuuna avammut takutinneqassalluni puisinniarneq qanoq ingerlasarnersoq.
Video, kalaallit qanoq puisinniartarnerannik paasinninnermik siuarsaasussaq nuannarineqartorujussuanngoreerpoq, inuillu naapittarfiini 300-t sinnerlugit takuneqareersimalluni.
– Puisinniarneq pillugu paatsuuinerpassuaqarpoq. Inuit amerlanerpaartaasa Kalaallit Nunaanni pissutsit ilisimasaqarfiginngilluinnarpaat soorunamilu puisinniarneq qanoq pisarnersoq takusimanngisaannarlugu. Taamaattumik filmiliorpugut nalinginnaalluinnartumik piniarnermik takutitsisumik, Inuit Sila paasissutissiivoq.
Amerlasuut aperisimapput Inuit Sila-p video sooq tuluttut suliarisimanngikkaa, maannakkorpiarli Inuit Sila-p Danmarkimi isiginninnerup allanngortinnissaa sammivaa, Danmarki EU-mi Kalaallit Nunaannut sinniisuummat. Kingusinnerusukkulli Inuit Sila-p tuluttut saqqummersinniarpaa.
– Tamanna kingusinnerusukkut alloriarnerussaaq pingaarutilik, malitseqartinnissaanulli aningaasat suli pigineqanngitsut pisariaqartinneqarput, Inuit Sila nassuiaavoq.
Allaaerisap qulerpiaani kalaallit puisinniarnerannik video takujuk