Inuit pisinnaatitaaffiisa eqqartuussiviannut maalaaruteqartoq

Uranimik piiaanissamik assortuussut maanna Strassbourgimi Inuit pisinnaatitaaffiisa eqqartuussiviannut maalaarutigineqarpoq.

Sapaatiummat Narsami innuttaasunik ataatsimiititsinermi taamatut paasissutissiivoq uranimut naaggaartoq partiimillu Inuit Nation pilersitsisoq, Falke Thue Mikaelsen.

Pissutsit arlallit

Maalaarut nassiunneqarpoq januaarip 22-anni, Falke Thue Mikaelsenillu maalaarunni pissutsinik arlalinnik tunngavilerpaa: Avatangiisinut inatsimmik unioqqutitsineq aammalu pinerluttulerinermut inatsimmik unioqqutitsineq kiisalu nunat inoqqaavisa pisinnaaitaafii pillugit FN-ip nalunaarutaanik unioqqutitsineq.

Tamakkuninnga unnerluutigineqartut tassaapput maanna Naalakkersuisuusut siusinnerusukkullu Naalakkersuisuusimasut, politikeri paasissutissiivoq.

Isumaqatigiissut

Eqqartuussiveqarnikkut siunertaavoq nunat ilaasortaasut isumaqatigiissut Den Europæiske Menneskerettighedskonvention (Europami Inuit Pisinnaatitaaffiinik Isumaqatigiissut) malissagaat.

Inuit Pisinnaatitaaffiinut Instituti naapertorlugu innuttaasut naalagaaffiillu eqqartuussivimmut maalaaruteqarsinnaapput, isumaqarunik inuit pisinnaatitaaffii innarlerneqartut.

Sulili ilisimaneqanngilaq eqqartuussiviup allattoqarfia maalaarummut qanoq isummissanersoq.