Inuit Pisinnaatitaaffiinut Siunnersuisoqatigiit nutaamik siulittaasortaarpoq

Inuit Pisinnaatitaaffiinut Kalaallit Nunaata Siunnersuisoqatigiivisa inissitsiterluni ataatsimeereernerata kingorna siulersuisui allanngorput. Inuit Pisinnaatitaaffiinut Kalaallit Nunaata Siunnersuisoqatigiivinut 2015- miit 2017-mut ilaasortassanik toqqaasoqareernerani nutaamik siulittaasoqalerpoq.

Siulittaasunngorpoq Inge Olsvig Brandt, allaffeqarfimmi pisortaq aamma Naligiissitaanissamut Kalaallit Nunaata Siunnersuisoqatigiivineersoq, siulittaasumut tullinngorput Martha Abelsen, ICC-mit aallartitaasoq aamma Ludvig Larsen SIK-mit aallartitaasoq.

'Killiffimmut nalunaarusiaq 2014'-ip, atituumik, ajornartorsiutinillu arlariinnik inuit pisinnaatitaaffiinut tunngasunik, imaqartup, saqqummersinneqarneranut atatillugu suleqatigiisitanik sisaminik pilersitsisoqarpoq.

Siunnersuisoqatigiit nutaajusut aalajangerput suleqatigiisitat pioreersut atatiinnarneqassasut tassaasut Meeqqanut Inuusuttunullu tunngasunut suleqatigiisitaq, aamma ilinniagaqarnermut tunngasunik suliaqalersussaq, Innarluutilinnut tunngasunut suleqatigiisitaq, Inatsisitigut Illersorneqarnissamut suleqatigiisitaq aamma Naligiisitaanermut, Oqaatsinut Kulturimullu suleqatigiisitaq.

- Siunnersuisoqatigiit suliaasa ataqatigiittuaannarnissaannut suleqatigiisititat suliaminnik ingerlatseqqinnissaat pingaaruteqarpoq, soorlulittaaq pingaaruteqartoq Siunnersuisoqatigiit ilaasortaasa suut siunissami suliarissaneritik isummersorfigiuartariaqaraat, Inuit Pisinnaatitaaffiinut Kalaallit Nunaata Siunnersuisoqatigiivini siulittaasunngortoq, Inge Olsvig Brandt, tusagassiutinut nalunaarummi oqarpoq.

Nalunaarusiaq nutartertuarneqassaaq sammisanillu nutaanik ilaneqartassalluni.