Paasissutissat

Inuit Pisinnaatitaaffiinut Kalaallit Nunaata Siunnersuisoqatigiivi online-miilerput

Inuit Pisinnaatitaaffiinut Kalaallit Nunaata Siunnersuisoqatigiivi nutaamik nittartagartaarput

Nittartagaq www.pisinnaatitaaffikka.gl/www.humanrights.gl maanna tamanut saqqummiunneqarpoq. Nittartagaq Inuit Pisinnaatitaaffiinut Kalaallit Nunaata Siunnersuisoqatigiivi pillugu paasissutissanik imaqarpoq, aammalu inuit pisinnaatitaaffii pillugit paasissutissat paasiuminartut imaralugit, aammaattaaq soqutigisaqaqatigiit kattuffiinut taavalu suleqatigiiffinnut allanut inuit pisinnaatitaaffiinik suliaqartunut link-eqarpoq.
Taamaatut tusagassiorfinnut nalunaarutikkut paasissutissiivoq Inuit Pisinnaatitaaffiinut Kalaallit Nunaata Siunnersuisoqatigiivini siulittaasoq Aaja Chemntiz Larsen.
Taanna oqaluttuarpoq nittartagaq Siunnersuisoqatigiivisa facebook-ianut “Inuit Pisinnaatitaaffiinut Kalaallit Nunaata Siunnersuisoqatigiivi”-mut atasoq. Tassani Siunnersuisoqatigiit akulikitsumik paasissutissat nutaarsiassallu inuit pisinnaatitaaffiinut attuumassuteqartut siammarsertassavaat.
– Siunnersuisoqatigiit neriuutigivaat nittartagaq aqqutigalugu inuit pisinnaatitaaffiisa ilisimaneqarnerat siammarneqassasoq. Nittartagaq ineriartortittuassuarput, inuit pisinnaatitaaffiilu nalinginnaasumik sianigineqarnissaat anguniartuassavarput ”.
Nittartagaq inuit pisinnaatitaaffii pillugit paasissutissanik ilisimasanillu erseqqaarisunik imaqarpoq. Aammattaaq isumaqaraanni inuit pisinnaatitaaffii unioqqutinneqarsimasut atortunik atorneqarsinnaasunik imaqarpoq, s.i. Siunnersuisoqatigiinni kattufiit ilaasortaasut assigiinngitsunut link-it. Siunnersuisoqatigiit maalaaruteqarfiunngilaq taamaattumillu suliat ataasiakkaat suliarisinnaanagit, taamaattorli ikiorserneqarnissamut saaffigininnissamut innersuussisinnaalluni. Siunnersuisoqatigiit ukiumut marloriaq ataatsimiittarput.

Powered by Labrador CMS