Inuit pisinnaatitaaffiinik meeqqanut ilinniartitsisarneq misissorneqartoq

Meeqqat pisinnaatitaaffiinik suliaqarfik, Meeqqat Inuusuttullu Oqaaseqartartuat, MIO, Ilinniarnermik Ilisimatusarfik suleqatigalugu misissuisitsinermik aallartitsivoq, meeqqat atuarfianni inuit pisinnaatitaaffiinik, meeqqallu pisinnaatitaaffinik qanoq annertutigisumik ilinniartitsisoqartarnera misissuinermi qulaajarneqassalluni.

Meeqqat atuarfianni inuit pisinnaataaffiisa qanoq annertutigisumik ilinniartitsissutigineqartarnerisa paaserusunneqarnerat misissuinermut tunuliaqutaavoq. Misissuineq MIO-mit Ilimmarfimmillu aallartinneqarpoq, Inuillu Pisinnaatitaaffiinut Kalaallit Nunaata Siunnersuisoqatigiivisa aningaasanik tapiissuteqarnerat misissuinerup piviusunngortinneranut tunuliaqutaavoq.

Misissuineq Ilinniarnermik Ilisimatusarfimmi ilinniagaqartut, ilinniarnerminnut atatillugu ingerlappaat.

- Misissuineq maannamut Narsami Paamiuni, Ilulissani, Maniitsumi, Upernavimmi Nuummilu ingerlanneqarpoq. Uummannamilu misissuisoqarnissaa naatsorsutigaarput, taamaasilluta illoqarfiit assigiinngitsut arfineq-marluk misissuinitsinnut tunngavigisinnaassagatsigit, adjunkti Kathrine Kjærsgaard tusagassiutinut nalunaarummi oqarpoq.

Ilinniartitsineq annertooq
Naalagaaffiit Peqatigiit nunani tamani meeqqanut ullorititaanni juunip aallaqqaataanni ukioq manna misissuineq tamanut saqqummiussinnaassallugu MIO-p, Ilinniarnermik Ilisimatusarfiup, Inuillu Pisinnaatitaaffiinut Kalaallit Nunaata Siunnersuisoqatigiivisa naatsorsuutigaat.

Meeqqat Oqaaseqartartut Inuillu Pisinnaatitaaffiinut Kalaallit Nunaata Siunnersuisoqatigiivisa siulittaasuat Aaja Chemnitz Larsen tamatumunnga atatillugu imatut oqaaseqarpoq:

- Meeqqat pisinnaatitaaffiisa qanoq amerlatigisunit ilisimaneqarnerannut ilinniartitsisut immikkut pingaaruteqarput. Misissuinermi inernerit siullerpaat takutippaat, meeqqat atuarfianni inuit pisinnaatitaaffiinik meeqqallu pisinnaatitaaffiinik ilinniartitsisarnerit assigiinngiiaartorjusussuusut.

Misissuinermit paasisat ilaatigut tunuliaqutaralugit MIO-p meeqqat pisinnaatitaaffiinik ilinniartitsissutit nutaat, sungiusarnermut sammititaasut ineriartortillugit aallartippai. Ilinniartitsissutit nutaat MIO-p qanittukkut misilerartippai, meeqqallu pisinnaatitaaffiisa meeqqat atuarfianni skemanut siunissami annertunerusumik ilaatinneqalernissaat annertuumik neriuuteqarfigalugu.

Meeqqat pisinnaatitaaffiinik ilisimasat meeqqanut inersimasunullu siaruaanneqarnissaannut pisortat qulakkeerinninnissamut pisussaaffiat Naalagaaffiit Peqatigiit meeqqat pillugit isumaqatigiissutaanni artikel 42-mi allaaserineqarpoq.