Inuit Pisinnaatitaaffii pillugit Siunnersuisoqatigiiffianni siulittaasoq nutaaq
Inuit Pisinnaatitaaffii pillugit Kalaallit Nunaata Siunnersuisoqatigiiffiat nutaamik siulittaasoqarfeqalerpoq.
Siulittaasoqarfik ukiuni marlunni tulliuttuni tassaassapput siulittaasoq Carl Christian Olsen (Puju) ICC-mit toqqagaasoq siulittaasullu tullia Leif Fontaine KNAPK-mit toqqagaasoq, siunnersuisoqatigiit tusagassiuutinut nalunaarummi ilisimatitsipput.
Killiffik pillugu nalunaarusiaq suliarineqartoq
Siunnersuisoqatigiiffiup ullut 15. aamma 16. marts 2017 ataatsimiinnerminni Kalaallit Nunaanni Inuit pisinnaatitaaffii pillugit Killiffik pillugu Nalunaarusiami inassuteqaatit oqallisigaat iliuuseqarfissallu isumaqatigiissutigalugit, taakkulu siunnersuisoqatigiinni ilaasortaanit aamma Danmarkimi Inuit Pisinnaatitaaffii pillugit Ingerlatsivimmit suliarineqassapput.
Immikkut soqutigineqarlutik oqaluuserineqartut tassaapput inatsisitigut innarlitsagaaliugaaneq aamma innarluuteqartunik sullissineq, ilisimatitsissutigineqarpoq.