Inuit pisinnaatitaaffii pillugit siunnersuisooqatigiit ataatsimiilerput
Inuit pisinnaatitaaffii pillugit Nunatsinni siunnersuisooqatigiit siullermeerutaasumik marlunngornermi pingasunngornermilu ataatsimiissapput
Inuit Pisinnaatitaaffiinut Kalaallit Nunaata Siunnersuisoqatigiivisa 4. marts pilersinneqarnerisa inissitsiternerisalu kingorna siullerpaamik atatsimiinneq pissaaq 8. aamma 9. oktober Nuummi. Ulloq siulleq inuit pisinnaatitaaffii pillugit pikkorissarnermut atorneqassaaq.
Ataatsimiinnermi Nunatsinni inuit pisinnaatitaaffiisa ullutsinni inissisimanerat nalilersorneqassapput siunissamullu isigisumik siuliassat tulleriiaarnissaat oqaluuserineqassallutik. Tamanna siunertaralugu suleqatigiissitanik pilersitsisoqassaaq, taamaalilluni suliassat assigiinngitsut aallartinnerisigut innuttaasut inuit pisinnaatitaaffii pillugit ilisimasaqarnerulernissaat angujumallugu.
- Ungasinngitsukkut nunatsinni inuit pisinnaatitaaffiisa inissisimanerat pillugu nalunaarusiaq Danmarkimi Inuit Pisinnaatitaaffii pillugit Ilisimasaqarfimmit (Dansk Institut for Menneskerettigheder (IMR)) suliaralugu siunnersuusiaq saqqummissaaq. Nalunaarusiassatut siunnersuut nalilersussavarput, nalilersuinittalu siunissami suliassatta unammilligassartaannik tikkuussinissarput ilimagisariaqarpoq, Hjalmar Dahl Siunnersuisoqatigiinni siulittaasoq oqarpoq.
Nalunaarusiap imarisassai Siunnersuisoqatigiinnit pingaarnersiorneri peqataaffigaavut ilaatigullu pisinnaatitaaffiit sammineqartussat tassaallutik, meeqqat, inuit innarluutillit, eqqartuusiveqarnikkut illersorneqarnissamik minnerunngitsumillu pisinnaatitaaffiit pillugit ilinniartitaanissamik paasissutissinneqartarnissamillu pisinnaatitaaffiit, Hjalmar Dahl ilanngullugu ilisimatitsivoq.
Siunnersuisoqatigiit ilisarnaatissaanik nunarput tamakkerlugu unammisitsivugut innutaasut inuit pisinnaatitaaffii pillugit sulinitsinni peqataanissaat aamma siunertaralugu.
- Nuannaarutigeqisatsinnik soqutiginninneq annertoqaaq, pingasunngorpallu ataatsimiinitsinni ilisarnaaterpassuit tigusavut nalilersussavagut aalajangiiffigalugillu. Tamatuma kingorna kikkut ajugaanersut nalunaarutigineqarumaartoq, Hjalmar Dahl-ip naggataatigut oqaatigaa.
Siunnersuisoqatigiit 17-inik ilaasortaqarput, taakkulu inuiaqatigiinni suliassaqarfinnit inuillu pisinnaatitaaffiinnik soqutigisaqartunit suliaqartunillu toqqagaapput.