Nuuk

Inuit pingasut inip iluaniinneranni angutip ini ikuallakkiaraluaraa

Ikuallattoq siaruaannginnerani qaminneqarpoq

Angut 62-inik ukioqartoq Nuummi politiinit ulluni 28-ni tigummigallarneqassaaq. Angut illumik Nuussuarmiittumik ikuallaariaraluartutut pasineqarpoq. Ikuallaariarnerani inip iluani inuit pingasut isersimapput marlunngornerup ualinerani. Angut ikuallaariareersoq politiinit tigusarineqarpoq.

Inuit inigisap iluaniittut pujornera paasivaat, namminerlu qamillugu, tassanngaanniillu politiinut sianerput.

Eqqartuussisoqarfik Sermersuup aalajangerpaa angut 62-nik ukioqartoq politiinit tigummigallarneqassasoq ulluni 28-ni, toqutseriarsimasutut pasineqarluni.

Qimaariaraluartoq
Unnerluussisup inassutigaa angut ulluni 28-ni tigummigallarneqassasoq, illersuisup politiinit iperarneqarnissaa kissaatigalugu.

Angut 62-nik ukioqartoq ikuallaariareernermi kingorna qimaavoq, politiinillu inip ungasinngisaaniittoq tigusaralugu.

Angut inillu iluaniittut tamarmik imigassartorsimapput, Eqqartuussivik Sermersuumi unnerluussisoq oqarpoq.

Powered by Labrador CMS