isiginnaartitsineq
Inuit oqaluttuassartaat isiginnaartitsisarfiit akissarsiaritittagaanut piukkunneqartoq
Isigaannagassiaq "Nalusuunerup taarnerani" soqutigineqarluartumik isiginnaartitsissutigineqaqattaaqqammertoq italiami isiginnaartitsisarfiit akissarsiaritittagaanut piukkunneqarpoq.
Isiginnaartitsissut Inuit Theaterimit Teater Solarisimillu suliarineqartoq, isiginnaagassiap akissarsitinneqartussanut piukkussaanera nuannaarutigeqaat.
Aamma atuaruk: Qallunaatsiaanik aassunnitsumik akiuunneq pillugu oqaluttuaq kusanartoq
- Milanimi festivalertoqarnissaanut aggersagaanerput nuannaarutigalugu tulluusimaarutigaarput. Akissarsiaritinneqartartumut piukkunneqarput ataqqineqaatigaarput nunarsuarmilu isiginnaartitsisaarfiit Kalaallit Nunaat paasisaqarfigissavaat, isiginnaagassiami Inuit oqaluttuaataanni inuttaaqataasoq Nukâka Coster-Waldau oqarpoq.
- Festivalini ima ittuni isiginnaartitsisarfiit pisortaasa ilitsersuisartullu isiginnaagassiat pisiarisarpaat isiginnaartitsisarfiutiminni takutitassianngorlugit. Taamaasilluni Kalaallit Nunaat nunarsuarmi isiginnaartitsisarfinni ilanngunneqarnissaanut periarfissatsialaavoq, Nukâka Coster-Waldau, Sermitsiaq.AG-mut erseqqissaavoq.
Tamarmik peqataassanersut nalunarpoq
Inuit Teateri Teater Solarisilu tamarmik peqataassanersut nalunarpoq. Milanimi isiginnaangassiap takutinneqarnissaa kissaatigineqarsimavoq.
Maajip 24-ni – 25-nilu festivalertoqarnissaanut Milanimut angalaneq akikitsuinnaanngilaq.
Aamma atuaruk: Nukâka isiginnaartitseqaannginnermini: "Nuannaarpunga tulluusimaarlugalu"
International Prize Il Teatro Nudo di Teresa Pomodoro-festivallimi nerisaqarneq ineqarnerlu kisiamik akilerneqartussaapput. Taamaammat isiginnaartitsisartut tamarmiullutik angalassagunik 100.000 koruunit amigaatigaat.
Anigaasaliisussarsiorput
"Naluusuunerup taarnerani" nunarsuarmi isiginnaartartunut allanut takutikkumallugu anigaasaliisussarsiortoqaleruttorpoq.
- Isiginnaartitsissutip Katuami, Upernavimmi, Ilulissani, Aasianni Sisimiunilu tigulluarsimaneqarneranut qujassutigaarput. Minnerunngitsumillu aningaasaateqarfiit angalanitsinnik tapeeqataasimasut, Nukâka Coster-Waldau oqarpoq. Neriuutigaalu majimi Milanimut angalanissaq piviusunngortikkumallugu aningaasaliisussanik nutaanik pissarsisinnaassallutik.