Ilulissat:
Inuit marluk unnuaq annaanneqartut
Sikoqarpallaarnera anorlerneralu pissutigalugu Ilulissat Kangerluani umiatsiaaqqamiittut annaanniarneqartariaqarsimapput
Air Greenlandip qulimiguuliutaa SAR ippassaq unnukkut Ilulissat Kangerluanut 30 kilometerinik ungasissuseqartumut, umiatsiaaqqamut marlunnik inuttaqartumut sikumik ingerlaqqinnaveertumut aallartinneqarpoq.
Ajornartorsiortunut qanigisaasut marloriaq umiatsiaaqqamik kingusinnerusukkullu, angallamik 40 fodsimik angitigisumik ikiuiniarlutik misiliisimagaluarput, kisianni sikoqarpallaarnera silarlunneralu pissutigalugu, tunniutiinnartariaqarsimapput, Kalaallit Nunaanni politiit nittartakkaminni taama ilisimatitsipput.
Motooriiartut
Ajutoortut pillugit nalunaarneq nalunaaqutaq 19.00 missaani pivoq, umiatsiaaraq marlunnik inuttaqartoq kangerlummi motooriiarsimammat.
Unnuakkut sila arfineq-pingasunik issippoq, anorlileriartorlunilu. Anoraasuarneralu kujasimmik 8 m/s tikittarpaa.
Atuaruk: Ajornartorsiortut qeqertamit annaanneqartut
Nalunaaqutaq unnuakkut marlunngulersoq, umiatsiaaqqamiittut annaanniarlugit politiit qulimiguulik Air Greenlandimeersoq umiatsiaaqqamut aallartinniarlugu aalajangerput.
Qulimiguulimmut amoorneqartut
- Silarlukkaluaqisumi ajornartorsiortut qulimiguulimmik amoorneqarlutik annaanneqarput. Nal. 0238 ajornartorsiortut Ilulissat mittarfianut apuunneqarput, apuunneqartut qiiagaluartut ajoqusersimanatik angerlamut apuunneqarput, politiit ilisimatitsipput.