ataatsimeersuarneq

”Inuit Inuussutissarsiornermut Siunnersuisoqatigiiffianik” pilersitsilersut

Issittup soqutigineqaraluttuinnarnera ilutigalugu inuit suliffeqarfiutaasa iluaqutiginiarneqassasoq, Anchoragemi aningaasarsiorneq pillugu ataatsimeersuarnerup kingorna, ICC isumaqarpoq.

Nunatsinni ICC-ip siulittaasuata Hjalmar Dahlip, Anchoragemi aningaasarsiorneq pillugu ataatsimeersuarnermi pitsaasumik naammassineqarnera nunannaarutigalugaa.

Inuit suliffeqarfiutaasa annertunerusumik suleqatigiinnerisa killeqarfiit akimorlugit inuussutissarsiornikkut periarfissat amerlanerulersissavaat.

Tamanna ICC aaqqissugaanik Anchoragemi ataatsimeersuarnermi oqariartuutigineqarpoq.

Inuit sinniisaat, suliffeqqarfiutaannik ingerlatsisut naalakkersuisuisalu ilaasa sinniisaat Canadameersut, Nunatsinneersut, Alaskameersut Tjukotkameersullu ataatsimeersuarneranni naamasseqqammersumi peqataasut inaarutaasumik isumaqatigiillutik nalunaaruteqarnerminni, issittoq akimorlugu qaninnerusumik suleqatigiinnissamik ineriartortitsinissaq sulissutiginiarpaat.

Tamanna toqqammavigalugu Suligasuartussamik suleqatigiissitamik pilersitsinissaq isumaqatigiissutigineqarpoq, Inuit Nunaannit peqataasunit tamanit marlunnik ilaasortaqartussamik. Suleqatigiissitap suliassaa tassaavoq killeqarfiit akimorlugit ”Inuit Inuussutissarsiornermut Siunnersuisoqatigiiffianik pilersitsinissaq, taamaalilluni Issittumi inuussutissarsiornikkut periarfissat annertusiartortinneqarniassammata.

Atuaruk: Vittus Qujaukitsoq Issittoq pillugu ataatsimeersuarnermi peqataanngilaq

Nunani avannarlerni aningaasaqarnerup ineriartorlualersimanerata Inuit suliffeqarfiutaat sunniuteqaqaataasut ICC-p inerniuliuutigaa. Sumiiffinni suliffeqarfiillu akornanni ikioqatigiinnermi ineriartorneq nukittorsarneqassasoq taakku isumaqarput.

- Annertusiartuinnartumik Issittup soqutigineqaraluttuinnarnera ilutigalugu inuit suliffeqarfiutaasa killeqarfiit akimorlugit annertusiartortumik suleqatigiinnissaat anguniarlugu alloriariarnissaq piffissanngorpoq, ICC Alaskap siulittaasua Jim Stotts ammaalluni oqaaseqarnermini ilaatigut oqarpoq.

Ataatsimeersuarnermi peqataasut tassaapput uuliasiornermik, silaannakkut immakkullu angallassinermik, aatsitassarsiornermik, attaveqarnermik aningaasaliisarnermillu suliaqartut ilisimasallillu. Taakku ullumikkut inissisimanerminnik siunissamilu Issittumi ineriartortitsinissamik periarfissanik saqqummiussipput.

Nunarput sinnerlugu ilaatigut peqataavoq, Royal Arctic Linenip pisortaanera, Verner Hammeken.

Ataatsimiinnermilu Naalakkersuisut sinnerlugit Vittus Qujaukitsoq (S) peqataavoq.

Nunatsinni ICC-ip siulittaasuata Hjalmar Dahlip ataatsimeersuarnerup pitsaasumik inerititalimmillu naammassineqarnera nunannaarutigalugu oqaatigaa.

Powered by Labrador CMS