ICC
Inuit inoqqaavisa pisinnaatitaaffii pillugit iliuuseqartariaqarpoq
ICC, FN-ip ataatsimeersuarnerani, nunat Issittup qanitaaniittut inoqqaaviisa pisiinnaatitaaffiisa qulakkeerneqarnissaat piumasaraat.
Ukiut qulit qaangiussimalerput Nunat Inoqqaavisa Pisinnaatitaaffii pillugit Naalagaaffiit Peqatigiit Nalunaaruteqarmata. Taamaakkaluartoq nalunaarutiginninnerup kingorna inatsisitigut ilanngunneqarsimanatik.
Tamatuma kingunerisaanik Saamit aamma Inuit nalunaaruteqarsimaneq iliuuseqarfigineqarnissaanik piumasaqarput.
Inuit Issittormiut Siunnersuisoqatigiiffiata (ICC) siulittaasua Okalik Eegeesiak Naalagaaffiit Peqatigiit ataatsimeersuartarfianni Issittumi nunat inoqqaavi, tassaasut, Saamit Siunnersuisoqatigiiffiat, Saamit Inatsisartui, ICC aamma Issittumi nunat inoqqaavisa inuusuttortaasa sinniisui sinnerlugit marlunngornermi oqalugiarpoq.
- Nunat Inoqqaavisa Pisinnaatitaaffii pillugit Nalunaarut Naalagaaffiit Peqatigiit ulloq 13. september 2007 ataatsimeersuarnerini isumaqatigiissutigineqartoq tassaavoq nunat inoqqaavisa pisinnaatitaaffiinik illersuinermut siuarsaanermullu allorfik pingaaruteqarluinnartoq, Okalik Eegeesiak oqalugiaammini oqarpoq.
Pisinnaatitaaffiillu nunani tamalaani inatsisitigut atuutsilerneqartariaqarput.
- Maannakkullu pisinnaatitaaffiit pillugit nalunaarut ukiunik qulinngortorsiorlugu nalliuttorsiutiginerani Issittumi nunat inoqqaavisa akunnitsinni nunat ataasiakkaat iluini naalakkersuisugut nalunaarummi anguniakkatut isumaqatigiissutit angutseqqullugit kaammattuiuarpugut, Saamit siunnersuisoqatigiivisa præsidentiat, Åsa Larsson Blind oqarpoq.
- Issittoq tamakkerlugu nunarsuullu sinnerani nunat inoqqaavi pisinnaatitaaffitta tamakkiisumik piviusunngortinnissaasa qulakkeerneqarnissaa qaffasissumik inissisimasumik pisussaaffittut tiguneqarsimasut qitiutillugit sulinerput ataavartumik ingerlapparput. Toqqammaviusumik pisussaaffiit isumaqatigiissutiginerini kinguarsarneqaratik akuerineqarnissaat isumaqatigiissutaavortaaq, Hjalmar Dahl, Nunatsinni ICC-mi præsidentiusoq oqarpoq.