innarluutillit illersuisuat

Inuit innarluutillit illersuisortaassapput

Naalakkersuisut atorfimmik nutaarluinnarmik pilersitsiniarput - Inuit Innarluutillit illersuisuat, innarluutillit pisinnaatitaaffii pisariaqartinneqartut taamaalillutik qulakkeerneqarsinnaaniassammata.

Inatsisartut
Inatsisartut ullumikkut Inuit Innarluutillit illersuisuannik atorfimmik pilersitsisoqassanersoq oqaluuserissavaat

Inatsisartuni inatsisissatut siunnersuummi ullumi oqaluuserineqartussami tamanna atuarneqarsinnaavoq.

Meeqqat illersuisuat assigalugu
Meeqqat illersuisuat meeqqat pisinnaatitaaffiinik suliaqartoq assigalugu, Inuit Innaruutillit illersuisuat FN-ip innarluutilinnut isumaqatigiissutaat aallaavigalugu innarluutillit nukittuumik attuumassuteqanngitsumillu inuiaqatigiinni sullissisoqassapput.

- Inatsisissatut siunnersuut Inuit Innarluutillit illersuisoqarfiannut, inuiaqatigiinni inuit innarluutillit pisinnaatitaaffiinut soqutigisaannullu kiisalu inunnut innarluutilinnut inuiaqatigiinni atukkanik paasissutissiinissamut sinaakkusiinissamut siunertaqarpoq. Inuit Innarluutillit illersuisuata suliaminut atatillugu inuit innarluutillit pisinnaatitaaffii atugaallu pillugit katersissaaq, ineriartortitsilluni ilisimasanillu politikerinut, oqartussaasunut, kattuffinnut innuttaasunullu siaruarterilluni, inatsisissatut siunnersuummut oqaaseqaatini tamanna allaqqavoq.

Akia: 2,5 millionit koruunit
Innarluutillit illersuisuat allattoqarfimmik suliassanik suliarinnittoqassasoq, ilisimatitsissutigineqarpoq. Siunnersuutigineqarportaaq Inuit Innarluutillit illersuisuat ukiumoortumik pisortani oqartussanik attuumassuteqartunik, pisortat namminersortullu suliffeqarfiinik, kattuffinnik peqatigiiffinnillu il.il. kiisalu innarluutilinni suliassaqarfimmi soqutigisaqaqatigiinnik allanik ataatsimiititsisassasoq.

2017-imut aningaasanut inatsimmut 2,5 millionit koruuninik immikkoortitsisoqareerpoq.

Powered by Labrador CMS