Inuit Ataqatigiit Pituffik pillugu apeqquteqaateqarput

Tallimanngornermi tusarliunneqarpoq Pituffimmi kiffartuussinissamut isumaqatigiissut annaaneqartoq pillugu suliassaq Folketingip januaarip 21-ani tuaviuullugu aalajangerpaa oqallisigineqartussanngorlugu. Akerlianik nunatsinni Inatsisartut Inuit Ataqatigiit Naalakkersuisunik aggersaarusullutik kissaataat itigartitsissutigivaaat.

Maanna Inuit Ataqatigiit taarsiullugu apeqqutinik arlaqartunik Naalakkersuisunut nassiupput.

Inuit Ataqatigiit siulittaasuata Sara Olsvigip ilaatigut partiip apeqqutai 13-init ima tunngavilersorpai:

- Pituffimmi sullissinissaq pillugu isumaqatigiissummut atatillugu suliaq qineqqusaarnerup nalaani pitorarpoq. Naalakkersuisut suliamut tassunga atatillugu malunnartumik nipaassimapput. Allaammi Naalakkersuisunut ilaasortat ilaat oqarpoq suliap ingerlanera pillugu ilisimatinneqarsimanani.

- Suliaq Folketingimi annertuumik ukkatarineqarsimavoq. Kalaallit Nunaannut tunngatillugu Ataatsimiititaliaq ammasumik isumasioqatigiissitsivoq, tassanilu nunanut allanut ministeri ilaatigut oqarpoq sullissinissaq pillugu isumaqatigiissutip tamatigut isumaqatiginninniutigineqarnerata nalaani Naalakkersuisut qanimut akuutinneqarlutillu ilisimatinneqarsimasut.

- Isumaqarpugut suliami matumani Inatsisartut paasissutissat kingulliit ilanngullugit tamakkiisumik ilisimatinneqarnissaat pingaaruteqarluinnartuusoq, kiisalu suliami tassani Naalakkersuisut inissisimanerat qulaajarneqartariaqartoq, Sara Olsvig allappoq.

Februarip ulluisa 20-at tikillugu eqqartuussisunut annerusunut suliassanngortitsisoqarsinnaavoq, USA-mi eqqartuussivimmut maalaaruteqartarfimmut immikkut ittumut ingerlatsiviit sullissinissaq pillugu isumaqatigiissummik pinnanngitsut maalaarfigisimasaannut.

Atuaruk: Folketingip Pituffik pillugu suliassaq tuaviortumik suliarissavaa