peqqinnissaqarfik

Inuit Ataqatigiit peqqissutsimut ministerimut oqaloqatiginnissapput

Peqqissutsimut ministerip akuersissutit suliarineranni Kalaallit Nunaannut ilisimatitsisarsimannginneq IA tunuliaqutaralugu Folketingimi ilaasortamut Johan Lund Olsenimut nassuiaateqassaaq

Tarnip nappaataanut nakorsap Danmarkimi Kalaallit Nunaannilu sulisup akuersissutaata atorunnaartinneqarsimanera pillugu oqallittoqalerpoq.
Danskit peqqinnissaqarfiata akuersissutinik atorunnaarsitsisarnerat ajoquteqanngitsumik ingerlasarnersoq Inuit Ataqatigiit tunuliaqutaralugit Folketingimi ilaasortap Johan Lund Olsenip qularnaarusuppaa.
Tassami ilaatigut ima pisoqartarpoq Danmarkimi akuersissuteqarunnaarsimasut ilaat Kalaallit Nunaanni sulilertarmata. Taamaattumik IA tunuliaqutaralugu politikkeri peqqissutsimut ministerimut Nick Hækkerupimut Socialdemokratimeersumut apeqquteqarpoq.
Nassuiaasoqarnissaa piumasarineqarpoq
Peqqinnissaqarfimmi sulisut akuerisaanerminnik arsaarneqarnerannut tunngatillugu Kalaallit Nunaanni peqqinnissamut oqartussaasut aalajangersimasumik ilisimatinneqartarsimannginnerannut atatillugu Nick Hækkerupip nassuiaateqarnissaa Johan Lund Olsenimit piumasarineqarpoq.
Peqqissutsimut ministeri Kalaallit Nunaat pillugu Ataatsimiititaliap apeqqutaanut akissummini ilaatigut allappoq, peqqinnissaqarfimmi sulisup akuerisaanera annikillisinneqaraangat, Peqqissutsimut Aqutsisoqarfiup Nunat Avannarliit allat ilisimatittarai 1993-imi isumaqatigiissutaasimasoq naapertorlugu.
Apeqqutit pingasut
Peqqinnissaqarfimmi sulisut akuerisaanerminnik arsaarneqarnerannut tunngatillugu Kalaallit Nunaanni peqqinnissamut oqartussaasut aalajangersimasumik ilisimatinneqartarsimannginnerannut atatillugu, Peqqissutsimut ministerip kukkusoqartarsimanera nassuerutigineraa siulliullugu Johan Lund Olsenimit apeqqutigineqarpoq.
Aamma Ministerip Kalaallit Nunaat pillugu Ataatsimiititaliap apeqqutaanut akissutaanut ilassutitut Peqqissutsimut ministeri qinnuigineqarpoq 'immikkut pisunik' taaneqartut suut tunngavigalugit nalilerneqarlutillu nassuiaaserneqartarnersut, aammattaaq Peqqissutsimut ministeri qinnuigineqarpoq nassuiaqqullugu, aalajangersimasumik ilisimatitsisannginnermut suut pissutaasimanersut apeqquteqarpoq.
Powered by Labrador CMS