inuit pisinnaatitaaffii

Inuit assigiinngissusaat ataqqinneqarnerunissaat siunnersuisooqatigiinnit neriuutigineqarpoq

Inuiaqatigiinni avissaartuuttoqannginnissaa Inuit Pisinnaatitaaffiinut Kalaallit Nunaata Siunnersuisoqatigiivisa anguniarniarpaat

Inuit Pisinnaatitaaffiinut Kalaallit Nunaata Siunnersuisoqatigiivisa siulittaasuat, Aaja Chemnitz Larsen

Inuit Pisinnaatitaaffiinut Kalaallit Nunaata Siunnersuisoqatigiivi Nuummi ingerlanneqartumik suleqatigiinni suliaqaqqammerput, siunnersuisoqatigiinnilu ataatsimiillutik.

Inuit Pisinnaatitaaffiinut Kalaallit Nunaata Siunnersuisoqatigiivisa innuttaasut akornanni avissaartuuttoqannginnissaat sulissutigissagaat eqqartorneqarput, isiginiarneqassasorlu kikkulluunniit inatsit malillugu naligiimmata, aamma inuttut tunngaviusumik assigiinnik pisinnaatitaaffeqaratta, soorlu killiligaanani oqaaseqarsinnaaneq, demokratiimut peqataanissamut tamatta pisinnaatitaaffeqartugut, aamma inuiaqatigiinni mianerisariallit soorlu meeqqat inuusuttullu innarluutillit tunngaviusunik ikiorserneqarnissaaminnut pisinnaatitaaffeqartut, Inuit Pisinnaatitaaffiinut Kalaallit Nunaata Siunnersuisoqatigiivisa siulittaasuat Aaja Chemnitz Larsen nalunaarpoq.

- Inuit pisinnaatitaaffii tassaapput kikkulluunniit immikkoortinneqassanngitsut, Siunnersuisoqatigiillu assigiimmik sullinneqartannginneq aamma immikkoortinneqartarnermut tunngatillugu maalaartarfimmik pilersitsisoqarnissaannik eqqartuipput, tamannalu piffissaq sivisunerusoq eqqarsaatigalugu anguniagassatut aalajangiunneqarpoq, Aaja Chemnitz Larsen oqarpoq.

Ataqqeqatigiinnissaq
- Inuit Pisinnaatitaaffiinut Kalaallit Nunaata Siunnersuisoqatigiivisa oqaatsit kulturilu pillugit suleqatigiissitaliaanni ukkaassinerat allanngortinneqarpoq ima ”Naligiimmik sullinneqarneq – kulturi aamma oqaatsit”, aallaaviulluni kikkunnut tamanut inuttaasut amerlanersaannut aammalu inuttaasuni ikinnerussutilinnut tamanut Kalaallit Nunaanniittunut inatsit assigiimmat, tamarmik assigiinnik pisinaatitaaffeqarmata. Suleqatigiissitaq eqqartukkat inerneri tunngavigalugit sulinerminnut tunngatillugu erseqqaarinnerusumik pilersaarusiussapput, inuiaqatigiinnilu innuttaasut tamarmik naligiimmik sullinneqartarnissaat ukkatarineqarumaarpoq.

Inuit pisinnaatitaaffiinik ilisimasat siaruaannerusariaqartut Aaja Chemnitz Larsen oqarpoq, innuttaasut amerlanerit tunngaviusumik pisinnaatitaaffitik ilisimalerniassammatigit.

- Inuit Pisinnaatitaaffiinut Kalaallit Nunaata Siunnersuisoqatigiivisa suliassaat annertuvoq, piffissarlu atugassaq sivisussaaq, kisianni kissaatigaarput innuttaasut pisinnatitaaffimminnik annerusumik ilisimasaqalerumaarnissaat pingaarnertut sulissutigerusullugu, Aaja Chemnitz Larsen oqarpoq.

Powered by Labrador CMS