kapisilinniarneq
Inuinnaat kapisilinniaqqusaajunnaarput
Saniatigooralugu aalisartut kapisilinniarsinnaajunnaarnissaannut aalajangerneq, Isumaginninnermut, Suliffeqarnermut Inuussutissarsiornermullu Ataatsimiititami siulittaasumit assut ingasagineqarpoq.
Saniatigooralugu aalisartartut kapisilinniarnissaat periarfissaajunnaarpoq, Nuummilu kapisilinnik tunisineq unissaaq. Kapisilinniarnermut pilersaarut nutaaq Aalisarnermut Naalakkersuisoqarfimmit taamatut pilersaarutigineqarpoq.
Pilersaarut ulluni arfineq-pingasuni tusarniaassutigineqarpoq aalisarnermullu siunnersuisoqatigiinni ilaasortat kisimik tusarniaavigineqarlutik.
Ilaatigut Canadamiut Kalaallit Nunaanni kapisilinniarnermik killilersuerusupput.
Tassa imaappoq, kommunit, aammalu Kommuneqarfik Sermersooq ilanngullugu, isummernissaminnut periarfissinneqarsimanngillat, naak pilersaarut naapertorlugu kommunimi saniatigooralugu aalisartartunut Nuummilu suliffeqarfinnut annertuumik kinguneqartussaagaluartoq.
Tamanna Nuummi suliffissanik akeqassasoq Kommuneqarfik Sermersooq tusagassiorfinnut nalunaarpoq.
Isumaginninnermut, Suliffeqarnermut Inuussutissarsiornermullu Ataatsimiititap 25. juuni immikkut ittumik ataatsimiinnermini eqqartorpaat, siulittaasullu tulliata Storm Ludvigsenip tamanna tupassutigaa.
- Ilaqutariit SIK naapertorlugu akissarsiaqartut namminneq atugassaminnik kapisilinniarnissaat Naalakkersuisoqarfimmit mattunneqalerput – tunngavissaqanngitsumik. Ingasappallaarujussuarpoq nerioqaangalu isummatik allanngortikkumaaraat, Storm Ludvigsen kommunimit tusagassiorfinnut nalunaarut naapertorlugu oqarpoq.
Nuummissaaq tunisineq sooq unitsinneqarniarnersoq sukkut pitsaasumik tunngavissaqarnersoq paasiuminaatsippaa.
- Pisassiissutit nikisinneqanngillat. Sooq illoqarfimmi tunisisarneq unitsinniarneqarpa?, taama apeqquteqarpoq Storm Ludvigsen.
Taama allannguineq annertutigisoq, aalisarnermut siunnersuisoqatigiinni ilaasortat kisimik tusaaneqarsimaneri, Ataatsimiititamut tamanna tupannaqaaq.
- Isertukululluni aalajangiisarnerit isumaqarlunga qaangereerlutigit. Taamaallaat ilimagiinnarsinnaavara, naalakkersuisoqarfiup pilersaarut kanngusuutigingaarmassuk pissusissamisuunngitsumik tusarniaapput, taama oqarpoq Storm Ludvigsen.