Narsaq
Inuilimi qalipaatigissaartut mamarluartullu
Ilinniartitsisoq tunisassianillu ineriartortitsisoq Food College Aalborgimeersoq, Helle Madsen, nunatta nerisassiassaataanik nutaanik nerisassiorpoq
Pikkorissaaneq ullunik pingasunik sivisussuseqarpoq ullullu tamaasa sammisamik nutaamik qulequtaqartoqartarluni.
Tulliuttuni taaneqartut sammineqarput:
- Mamassutsit susunnissutsillu pissusissamisoortut atorlugit tarajortereriaatsit pujooreriaatsillu
- Avalaajanik kissartuunngitsunik kissalaartortalinnik isumassarsiorfissat
- Nerisassiassanik iluaqutiginninneq ikilissutaasartullu
- Naatitat nutaat aallaavigalugit nerisassianut pinnersaatit
- Qallersukkat nutaaliaanerusunngorlugit
- Immussuarnik isumassarsiorfissat
- Naatitanik paarnanillu Danmarkimi Kinamilu nerisassiornermi aggueriaatsit
Ullut pingajussaanni sammisatut qulequtarineqarpoq avalaajassat kissartuunngitsut, isigiuminartut mamarluartullu.
Tamatumani saarulliit, qeeqqat tuttullu atorneqarput, taakkua paarnanik naatitanillu aggukkanik eqqumiitsuliortorpalaartumik pinnersarneqarlutik.
Nerisassiat tamatuma kingorna ilinniarfimmi ullup-qeqqasiutissatut sassaalliutigineqarput.
Pikkorissarnermut nunatsinnit tamarmit neriniartarfinnit, akunnittarfinnit kantiinanillu peqataaniarlutik nalunaarsimasut qulingiluaapput. Taakkua saniatigut inuussutissalerinermik ilinniarfimmi ilinniartut ilaat tallimat peqataatinneqarput.