toqunartoq
INUILI: Neqiutivut trikineqanngillat
INUILI-mi nannup neqaa sassaalliutigineqarnikoq trikineqarlersitsisimaneranit pasineqartoq ajoquteqanngitsoq INUILI-p nalunaarutigaa. Tunillatsissimanermillu ersiuteqaraanni misissortinnissaq Nunatsinni nakorsaanerup innersuussutigaa
Inuit Ataqatigiit Narsami aaqqissuussaanik naapisimaartoqarmat peqataasut 50-t missaaniittut arlaannik ippigisaqarunik nakorsiarnissaat innersuussutigineqarpoq. Nukilerineq, kissarneqarneq, kiinnamik pullattoorneq isinillu aappillertooqqanik tunillatsissimanermut ersiutaasinnaapput.
Aasarmi aaqqissuussamit toqunartumik tunillatsissimasinnaapput.
Napparsimaveqarfiit aaqqissuussami peqataasimasut kalerreqqullugit nunatsinni nakorsaanerup Henrik Trykkerip piumaffigai.
- Narsami naapisimaanermi peqataasut pingasut nassaarfigaagut. Ilimanaateqarporlu amerlanernik nassaassasugut, Henrik Trykker Sermitsiaq.AG-mut paasissutissiivoq.
Aasaq naapisimaarnermi peqataasut nannup neqaanik sassaallerfigineqarput. Sassaalliutit INUILI-mi suliarineqarput. Nerisassiortulli paasigamikku neqi sassaalliutertik toqunartoqarsimasinnaasoq neqi misissorlugu aallartippaat. Neqiutimillu tunillannartoqarsinnaasunik nerisassioriaasertik misissoqqissaarlugu.
Atuaruk: Polikeri trikininik perululluni napparsimasoq
Nannup neqaa trikineqarnerarlugu pasineqartoq ajoquteqanngitsoq paasineqareeraluartoq neqit sinneri aamma misissorneqaqqipput.
- Nannup neqaa martsip 17-ni 2016-mi sassaalliutigineqartoq misissorneqareerluni trikineqanngitsoq peqqinnissaqarfimmit ullumi nalunaarfigineqarpugut, INUILI-mi forstanderi poul Nørris Christensen Sermitsiaq-AG-mut tallimanngorneq ualilluinnartoq nalunaaruteqarpoq.
Sillimaniarnerlu pingaartillugu ilinniarfik iliuuseqarpoq.
- Pisoq uggoralugu nannup neqaativut tamaasa arsaarinnissutigisariaqarsimavugut misissorneqarniassammata, Poul Nørris Christensen nassuiaavoq.
Inuit Ataqatigiit siulittaasuunerini ilaasortaq Bendt B. Kristiansen trikinerimik tunillatsissimalluni paasigamiut aasaq Narsami ataatsimiinnermi nanortukkaminit taamaalisimasoraaq.
Taanna sivisujaamik peqqissutsimigut akornuteqarsimavoq tunillatsisimasinnaanermullu takussutissanik pigisaqarsimalluni.
Tunillatsissimanermut takussutissallit kisimik napparsimaveqarfimmut saaffiginnissasut nakorsaanerup erseqqissaassutigaa. Peqataasullu allat malunnartoqanngikkunik saaffiginninnissaat pisariaqanngitsoq oqaatigalugu.
- Napparsimanermut takussutissaqanngikkaanni nakorsamut saaffiginninnissaq pisariaqanngilaq. Naak aaqqissuussami peqataasut ilai napparsimaleraluartut peqataasut ilai trikineqanngitsunik nerisimasinnaapput, timilluunniit nammineq akiuussutissaasa toqunartoq akioreersimallugu, nakorsaaneq erseqqissaavoq.
Nannup neqaa pineqartoq Narsami kalaalimineerniarfimi pisiarineqarpoq. Neqili trikineqannginnersoq misissorneqareerluni akuerineqarnissaa tuniniaasup akisussaaffigaa.