Trikinit
Inuili: Neqi uagut aamma nerivarput
Inuilimi sulisut aamma aasaq nannup neqaa sassaalliutigineqartoq nerisimavaat
Inuussutissanik ilinniarfimmi Inuilimi sulisut nannup neqaanik akerleriissutigineqartumik, Inuit Ataqatigiit aasaanerani Narsami ataatsimiinneranni sassaalliutigineqartumi kapuummi siatsimiittuni nammineerlutik nerisimapput.
- Nannup tuniniarneqartup neqaata ilaa pisiarisaralugu nammineq nerinikuugatsigu, ersiutinik malugisaqannginnatta oqiliallappugut, nunap nakorsaaneranit paasissutissat naapertorlugit allamik iliuuseqaqqittariaqanngilagut, ilinniarfimmi forstanderi Poul Nørris Christensen Sermitsiaq.AG-mut oqarpoq.
Sapaatip-akunnerata naanera sioqqullugu Inuit Ataqatigiit siulersuisuini ilaasortaq, Bendt B. Kristiansen saqqummerluni oqaluttuarpoq, trikininik tunillatsissimanermi kingorna suli kinguneqartitsilluni, taassumalu aasaanerani Narsami ataatsimiinnerup kingorna nannup neqaanik ussiinermi kingorna taamaalisimalluni isumaqarpoq.
Inuilimi forstanderip erseqqissaatigaa, ilinniarfimmi sulisut inuit pineqartut tamarmik peqqissusaannut tunngatillugu sunnerteqqasorujussuusut, tamarmillu napparsimanertik qaangerluarumaaraat neriuutiginerarpaa.
Kalaallit Nunaanni inuussutissanut siunnersuisoqatigiit nannup neqaanik aamma aarrinik nerisassiornermut ilitsersuutit nassiussimasaat atuarfiup ilisimavai.
Inuussutissanik ilinniarfittut soorunami nerisassioriaatsit ilisimavagut - aamma assersuutigalugu nannup neqaanut tunngatillugu. Ukiuni arlalinni nannup neqaa sassaalliutigisarlugulu nerisarparput, aamma assigiinngitsumik nerisassiarisarparput, forstanderi Poul Nørris Christensen naqissusiivoq.
Aasaanerani Narsami ataatsimiinnermut peqataasut inuit pingasut sooq trikininik tunillatsissimanersut, taassuma nassuiarsinnaanngilaa.
- Neqi misissorluaqqullugu tigunerata saniatigut maanna nassuiaatissartaqartinngilluinnarpara. Maanna paasisaqaqqinnissarput utaqqigallarparput, forstanderi ilisimatitsivoq.
Ilinniarfimmi taamatut assingusumik pisoqannginnissaa anguniarlugu maannakkorpiaq misissueqqissaaleruttorput.
- Ilutsinni atukkat aamma periutsit atorsimasagut pitsanngortitsinissaq siunertaralugu misissorpagut, Poul Nørris Christensen naqissusiivoq.