Arctic Prime Fisheries
Inuiaqatigiit isumalluutaannik kanngunaannartumik asuleerutiginninneq
Ole Aggo Markusseni Arctic Prime Fisheries pillugu Naalakkersuisunut sakkortuumik isornartorsiuivoq
Kujataani aalisarnermik suliffeqarfik Arctic Prime Fisheries aasap ingerlanerani ukioq manna avaleerasartoorniarnermi pisassiissutinik tunineqanngitsoorpoq, tamatumalu peqatigisaanik pisassiissutit allat tamarmiusut ikilineqarlutik. Arctic Primep pisassiissutinik tunineqannginnissaq kissaatigisimanngilaa tamannaluunniit sumik pissuteqarnersoq akisinnaasimanagu, naak ingerlatseqatigiiffik Kalaallit Nunaanni angerlarsimaffeqaraluartoq Kalaallit Nunaannilu aalisarnermik inuussutissarsiummik ingerlataqarnissamut aalisarnermut inatsimmi piumasaqaatinik tamanik naammassinnissimagaluartoq.
Maanna Ole Aggo Markussen, taamaalinerani ingerlatseqatigiiffimmi ataqatigiissaarisuusoq, oqaaseqarpoq, Naalakkersuisullu sooq inuussutissarsiortunut akeqqersimaartumik pissusilersornerannut nassuiaateqarluni.
– Arctic Primep ukioq mannamut avaleraasartoortassanik pisassinneqanninnera paasigatsigu tamanna uissuummissutigaarput, allaammik tupatsitaarujussuarluta. Avaleraasartoortassat ingerlatseqatigiiffiup aningaasaqarnerata pingaarnerup, aamma Qaqortumi, Nanortalimmi Kuummiunilu nunami tunisassiorfinnik ingerlatsinerup aningaasalersornissaanut pingaarutilerujussuugaluarput, Ole Aggo Markussen aallarniivoq.
Ingerlatseqatigiiffiup sooq kisartaalluni pisassiissuteqarfigineqannginneranut nammineerluni akissummik pissarsiniarsimagaluarpoq, iluatsinngitsumilli. Ingerlatseqatigiiffiup aalisarneq pillugu inatsimmi aalajangersakkanik sunik naammassinnissimannginneranik Naalakkersuisullu ukioq manna pisassiissuteqannginnissamut inatsisitigut tunngavigisaannik paasiniaasimagaluarpoq. Akissuteqarfigineqanngisaannarlunili.
– Tamanit ilisimaarineqarunartutut Arctic Prime Fisheries Kalaallit Nunaanni Islandimilu ingerlatsisut suleqatigiiffigaat. Aalisarneq pillugu inatsit aningaasaliisut nunanit allaneersut aalisarnermik suliffeqarfiup pisassiissutinik pigisaqartup pingajorarterutaa angullugu piginneqataasinnaanerannut periarfissiivoq, Ole Aggo oqarpoq nangillunilu:
– Naalakkersuisut nalaatsornerinnaasunik aalajangiussaqartussaanngillat, aqutsinertilli inatsisinik pioreersunik tunngaveqartittussaallugu. Inatsisit naammaginngikkaanni Inatsisartut qinnuigineqaqqaartussaapput inatsisit allanngorteqqullugit. Isumalluutinut pisinnaatitaaffinnik Naalakkersuisut ulloq taanna pissusissamisoortutut isigisaat tunngavigiinnarlugu tunniussisarneq inuiaqatigiinni inatsisitigut naapertuilluartussaanermik tunngaveqartuni akuersaarneqarsinnaanngilluinnarpoq, tamannami nunami tatiginninnermut, inuussutissarsiornermut aningaasaleerusussutsimullu aserorsaataavoq.
Allaaserisaq tamakkerlugu Sermitsiaq aviisimi atuaruk: