Inuiaqatigiit aningaasaqarniarnerannik misissueqqissaarneq isumaqatigiinngissutaasoq

Killiliussat taamalu inuiaqatigiit aningaasaqarniarnerannik misissueqqissaarnissami killiliinerit qanoq inerneqarnissaanut aalajangiisuulluinnartut, professori tikkuaavoq, taassuma KPMG-p misissueqqissaarnera suli isornartorsiorpaa oqaatigalugulu Qaqortoq kisimi isiginiarneqarsimasoq Kujataa tamakkerlugu isiginiarneqarani.

Aalborgip Universitetiani pilersaarusiornermut professorip Ulrik Jørgensenip inuiaqatigiit aningaasaqarniarnerannik misissueqqissaarneq Islandimeersup KPMG-p Kommune Kujalleq sullillugu suliarisimasaa sapaatip-akunnerani kingullermi isornartorsiorpaa, Sermitsiaq allappoq.

Ulrik Jørgensen allaaserisami ilaatigut issuarneqarpoq, nalunaarusiaq inniminnikkamik sulisitsinermut assinguneraramiuk, tamatumami qitiusumik aningaasaliiffiginiarneqartoq isiginiarneqarsimanngimmat; tassaasoq mittarfik. Tamatumunnga atatillugu ujartorlugit periarfissat allat, soorlu Narsarsuup mittarfiata allilerneqarnera aamma Narsarsuup, Narsap aamma Qaqortup akornisigut aqquserniorneq.

Kommune Kujalliup ingerlaannartumik akissuteqarluni oqaatigaa, mittarfiup sanaartorneqarnissaa, ingerlanneqarnissaa aningasaliiffigineqarneralu pineqanngitsut. Mittarfiliornerulli kingunerisassaasa qulaajarneqarnissaat kissaatigineqarmat. Tamatuma saniatigut kommunip tikkuarpaa aningaasaliissutit aamma mittarfiup ingerlanneqarnera misissueqqissaarnermut ilanngullugit naatsorsorneqarsimasut.

- Kommune Kujallermi inuussutissarsiortut aamma kommuni siunissami inuussutissarsiornermut sulisunillu ineriartortitsinissanut aningaasaliinissanut pilersaarusiorsinnaalernerannut nalunaarusiaq tunngaviliivoq, nalunaarusiammi takutimmagu Qaqortumi mittarfiliorneq akilersinnaasoq, Kommune Kujallermi pisortaaneq Kim Dahl oqarpoq.

Allaaserineqartoq tamakkiisumik Sermitsiami atuaruk. Aviisi uani pisiariuneqarsinnaavoq:

Powered by Labrador CMS