Wednesday, September 13, 2017 - 09:54

Inuiaqatigiinni sanngiinnerusunik misissuineq annertooq

Kalaallit Røde Korsiat ilisimatuussutsikkut misissuinermik aallartitsivoq
Assi.: Kalaallit Røde Korsiat
Inuiaqatigiinni sanngiinnerusumik inissisimasut pillugit paasiniaaneq, ilisimatuussutsikkut misissuineq Kalaallit Røde Korsiata februarimi ukioq manna aallartitaa, immikkoortup tullianut ingerlaqqippoq.

Septembarip aallaqqaataani ilisimatuut aqutsisullu ataatsimoorlutik oqarasuaatikkut paasiniaanerit inerneri misissorpaat, misissuinerup immikkoortuani tullermi atugassat.

Immikkoortoq siulleq tassaavoq oqarasuaat atorlugu paasiniaaneq, tassani kinaassusersiornani toqqakkat 970-iusut aasap ingerlanerani eqqugaasinnaasut pillugit apeqqutinik akiuisinneqarlutik, apeqqutit ilisimatuunit pingasunit paasiniaanermi aqutsisut suleqatigalugit suliarineqarnikuupput. Ilisimatuut 3-t tassaapput Marie Kathrine Poppel, Steven Arnfjord aamma Birger Poppel. Oqarasuaatikkut paasiniaaneq HS-analyse-mit ingerlanneqarpoq.

- Qaammatini tulliuttuni Nuummi sinerissamilu inuit qitiusumik inissisimasut apeqqutit assigiinngitsut akeqqullugit qinnuigineqassapput ilutsit sunniutillu suut meeqqat, inuusuttut inersimasullu oqimaatsorsiulernerinik kinguneqarsinnaasarnersut, Kalaallit Røde Korsiat tusagassiuutinut nalunaarummi allappoq.

Sanngiinnerusut
Taassuma ingerlanneqarnerani aammattaaq ilisimatuut Nuummi, Kujataani, Avannaani Nunattalu Kangiani alaatsinaanneqartut apersussavaat.

- Misissuinerup ingerlanerani ilisimatuut ilaat ataaseq siusinnerusukkut misissuinerni paasisat katersorniarpai. Inuiaqatigiinni sanngiinnerusumik inissisimasunik paasiniaanerup inernerinik tunngavilersueqataasinnaasunik. Paasiniaanermi aqutsisut 2018-ip aallartilaarnerani katersuuteqqissapput inernerit immikkoortui tamaasa misissorniarlugit. Misissuinerup tunngavilersorluakkamik Kalaallit Nunatsinni kikkut sanngiinnerpaamik inissisimanersut tikkuussinissaa ilimasuutigineqarpoq, Kalaallit Røde Korsiat ilisimatitsivoq.

Tamanna tunngavigalugu Kalaallit Røde Korsiata neriuutigaa 2018-imi upernaakkut peqatigiiffiit nammineq kajumissutsiminnik suliaqartuusut suliniuteqaqatigiiffiillu sapinngisamik amerlasuut katersorsinnaassallugit nammineq kajumissutsimik suliaqarnerup ataatsimoorluni ataqatigiissaarneqarnissaanut aammalu  attaveqaqatigiilluni meeqqanut, inuusuttunut inersimasunullu eqqugaasinnaasunut imaluunniit oqimaarsareersunut suliaqartoqarsinnaaqqullugu.

Inuiaqatigiinni sanngiinnerusumik inissisimasut pillugit paasiniaanermi aqutsisuusut inuttaraat: Lissi Olsen aamma Karo Thomsen Fleischer, KRK, Stine Egede, Anna Kûitse Kúko, Storm Ludvigsen, Aviâja Egede Lynge, Kurt Skjønnemann Pedersen kiisalu Jess G. Berthelsen aamma Henrik Leth.

Seneste nyheder / Nutaarsiassat kingulliit