internetti
Internettip unammilleqatigiiffiulernissaa Demokraatinit piumasarineqarpoq
Tele-Postip internetsimik ingerlatsisuunera allanngortittariaqartoq Demokraatit Naalakkersuisunut piumasaqaatigaat. Tamanna sulissutigisassatut siullertut inissinneqartariaqartoq aamma partiimit isumaqarput
Internettip ingerlanneqarneranut unammilleqatigiittoqarnissaanik misissuinerup unitsikkallarneqarnera Demokraatinit akerlilerneqarpoq.
Attaveqaatinik atuinermi namminersortunngorsaanissamut periarfissanik misissuinerup Tele-Postimit unitsinneqarsimanera nalunaarutigineqarpoq sapaatip akunnerata siuliani. Misissuisitsineq akisuallaartoq Tele-Postimit oqariartuutigineqarpoq, tamannalu Demokraatinit qisuariarfigineqarpoq.
Akuerineqarsinnaanngitsumik iliorneq
- Internettimut attaveqarnerup unammilleqatigiiffiunissaa ajoraluartumik kinguaattoorfiuvoq. Tamanna akuerineqarsinnaanngilaq taamaattumik Demokraatini manna aqqutigalugu Naalakkersuisut kaammatorusuppagut Tele Postimut erseqqissaqqullugu, unammilleqatigiiffiutitsinissaq pingaarnerpaatittariaqartoq aamma kinguaattooqqissinnaaanerit ilungersunartutut isigineqartariaqartut, Demokraatit tunuliaqutaralugit Inatsisartuni ilaasortaq Tillie Martinussen oqarpoq.
- Internetti Tele Postimut annertuumik niuerutaavoq aamma allaanngilaq kisermaallugu tigummiinnarusunneqarpasittoq sapinngisamik sivisunerpaamik. Kisianni Tele Postip tamanna puiguinnartariaqarpaa Demokraatit isumaat naapertorlugu, Martinussen tusagassiutinut nalunaarummi oqarpoq.
Akikinnerusunik ujartuisoqartariaqartoq
Internettimut attaveqarnermi unammilleqatigiittoqarnissaa pisariaqartoq Demokraatinit isumaqarput. Partiip qularinngilaa unammilleqatigiittoqarneratigut akit pitsaanerusut akikinnerusullu anguneqassasut.
- Taamaattumik iluaqutaanngilaq Tele Post unammilleqatigiilernissamut sivitsorsaarimmat kinguarsaallunilu, qulakkeerusunneqarpormi allat sullissisinnaasut Tele Postimut unammillersinnaassasut assigiinnik periarfissaqarlutik, Tillie Martinussen oqarpoq.