internetti killeqanngitsoq

Internetti nutarsaaffigineqarpoq

Novembarip aallaqqaataani teknologi-ni kabel-ikkut attavilitsigut attaveqanngitsutigullu unammillertoqarsinnaalissaaq

Steen Lynge: – Novembarip aallaqqaataanit Tele-Postip unammillertini nunaqarfinni illoqarfinnilu kabelinik atuisinnaalersissavai aammalu illoqarfiit nunaqarfiillu nunallu allat akornanni radiukkut sakkortusaaviit, immap naqqatigut kabelit satelletsillu atorlugit aallakaatitsinermi attaviit atorsinnaatissallugit

Peqqissutsimut attaveqarnermullu Naalakkersuisup Steen Lyngep ingerlatsisunut nutaanut ajornannginnerulersinniarpaa atuisartunut internettimi qarasaasiamilu kiffartuussinernik neqerooruteqarnissamut.

– Tamanna atuisartunut iluaqutaassaaq, taanna tusagassiorfinnut nalunaarutikkut naliliivoq.

Tele-Postip novembarip aallaqqaataanit internettimik ingerlatsisut nutaat illoqarfinni nunaqarfinnilu, illoqarfiit nunaqarfiillu akornanni nunanullu allanut radiokut sakkortusaaviit, immap naqqatigut kabelit satelltsillu atorlugit, Tele-Postip kabelii aqqutigalugit nalunaarasuartaatitigut kiffartuussinermik pilersuinernik ingerlatsisinnaatilissavai.

Tassami internettimi kiffartuussinerit qarasaasiakkullu kiffartuussinerit 2014-imi novembarip aallaqqaataani Kalaallit Nunaanni tamarmi nutarsaaffigineqassapput. Ingerlatsisut nutaat Tele-Postitulli assigiissunik atugassaqarlutik atuisartunik sullissinermi unammillersinnaalissapput. Nutaartaavoq novembarip aallaqqaataanit teknologiit kabelikkut attavillit attaviitsullu unammisoqalersinnaammayt.

Tassa imaappoq, ingerlatsisut nutaat atuisartunut manna tikillugu taamaasiorsinnaanatik ADSL-mik tunisassiat neqeroorutigisinnaalissavaat. Siusinnerusukkut tamakkua attaveqarfiit attaviitsut kisiisa atorsinnaasimavaat.

– Internettimi sullissinernik unammillertoqannginnerani ullut tamarmik inuiaqatigiinnut akisuujupput atuisartullu ikinnerusunik toqqagassaqartinneqarlutik, Steen Lynge oqarpoq nangillunilu:

– Unammillernikkut qulakkeerneqassaaq atuisartut attaviit, pisariaqartitaminnut pitsaanerpaat, pisinnaalissagaat. Tele-Post suli pisussaaffeqassaaq Kalaallit Nunaanni tamarmi atuisartunik sullissinissaminut, telemi kiffartuussutinik pitsaasunik akikitsunillu.

Tele-Postip suli akuersissuteqarfigissavai illoqarfinni nunaqarfinnilu kabel-itigut attaveqarfiit kiisalu illoqarfiit, nunaqarfiit nunallu allat akornanni aallakaatitsinermut attaviit, radiukkut sakkortusaaviit, immap naqqatigut kabelit satellitsillu aqqutigalugit, novembarilli aallaqqaataanit Tele-Postip ingerlatsisut nutaat attaveqarfiit taakkua atorlugit nalunaarasuartaatitigut sullissinernik pilersuisinnaalersissavai.

Steen Lyngep erseqqissarpaa pingaaruteqartoq Kalaallit Nunaanni nalunaarasuartaatitigut attaviit ineriartortittuarnissaat, tamaasilluni Kalaallit Nunaanni digitaliseriineq nukittorsarsinnaagatsigu.

– Taamaattumik Nuup avannaani immap naqqatigut kabelip annertusarnissaanik Tele-Postip pilersaarutai soqutiginnilluarlunga malinnaaffigaakka, taanna oqarpoq.

Steen Lyngep 2013-imi ukiakkut suliniut "Telemi nutarsaanissamut Sinaakkutassat" aallartippaa, tassuuna periusiortoqassalluni internettimi kiffartuussiviit attaveqanngitsut nutarterneqarnerisa kinguneranik internettimik tuniniaavimmi ineriartorneq pitsaasoq, qanoq isilluni nanginneqarsinnaanersoq. Periuseq 2018-ip tungaanut ingerlavoq, atuisartullu telemi sullissinernik akikinnerusunik pitsaanerusunillu pilersorneqarnissaannik sulinerup nanginnissaanut takussutissiissalluni.

Internettimi sullissinernik nutarsaaneq telemi tunisassianut pitsaanerusunut akikinnerusunullu alloriarneq siulliuvoq. Alloriarneq tulleq pissaaq 2016-imi, naatsorsuutigineqarluni taamanikkut mobilit telefonillu aalajangersimasumik attavillit nutarsaaffigineqassasut. Naatsorsuutigineqarpoq 2018-imi telemi kiffartuussinerit allat nutarsaaffigineqassasut, tusagassiorfinnut nalunaarummi allassimavoq.

Powered by Labrador CMS